"Сўғдиёна" яқинда келган легионери билан шартномани бекор қилди

Жиззахнинг "Сўғдиёна" клуби янги мавсум учун селекция ишларини олиб бораётганини биласиз. Яқинда жамоа сафига легионер ҳужумчи қўшилганди ва шартнома имзоланганди. Бироқ кутилмаганда у билан шартнома бекор қилинди. Бунга жиддий жароҳат сабаб бўлган. Клуб матбуот хизмати қуйидагича баёнот берди:

"Янги мавсумга тайёргарлик кўраётган «Сўғдиёна» швециялик легионер Жон Жуниор Игбарумаҳни ўз сафига қўшган эди. Футболчи қишки йиғин давомида, Дубайда бўлиб ўтган учрашувлардан бирида жиддий жароҳат олди.

Жамоамиз шифокорлари таъкидлашича, жароҳатни тиклаш учун етти ой вақт талаб этилади. Тикланиш жараёни мураккаб бўлгани сабабли, клуб ва футболчи ўзаро келишиб, шартномани бекор қилишди ва дўстона хайрлашишди.

Сўғдиёна футбол клуби футболчига соғлиқ ва келажакдаги фаолиятида омад тилаб қолади", - дейилади расмий хабарда.