Софиядан жонли кундалик: "Странджа" олдидан терма жамоа ичида нималар бўляпти?

Бокс мухлисларининг диққат эътибори Болгариянинг София шаҳрида ташкил этиладиган "Странджа" турнирига қаратилган десак муболаға бўлмайди. Албатта, кичик жаҳон чемпионати дея аталувчи ушбу мусобақага барча мамлакатлар кучли таркиб билан ташриф буюришади.

Бу сафар 35 та мамлакатдан келган 300 дан ортиқ боксчилар ғолиблик учун баҳсларга киришади. Табиийки, Ўзбекистон терма жамоаси ҳам кучли таркиб билан "Странджа" турнирига отланди. Таркибда мен ҳам жамоа менежери сифатида ўрин олдим.

Хабарингиз бор, узоқ йиллардан буён спорт журналисти сифатида яккакураш турларини мунтазам ёритиб бораман. Яқиндагина Ўзбекистон бокс федерациясининг матбуот котиби сифатида иш бошладим ва шу тариқа терма жамоамиз билан илк сафарга чиқдим. 

Менинг асосий вазифам жамоа менежери вазифасини бажариш  баробарида матбуот котиби сифатида мусобақани ҳам ёритишдан иборат. 

Биз Тошкент-Истанбул-София йўналишида ҳаракатландик ва ушбу парвозлар давомида терма жамоамиз аъзолари билан яқиндан танишдим ва ўзим учун уларни  янгидан кашф этдим. Барчаси тарбияли, оғир-босиқ...

Тўғриси, Жавоҳир Умматалиев билан кўп ҳамсуҳбат бўлмаганлигим сабабли, у ҳақида сал бошқачароқ фикрда эдим. Яъни, одамовироқ бўлса керак, деб ўйлагандим.Аксинча, бунинг мутлақо тескариси бўлиб чиқди. Очиқ, киришимли ва барча билан бирдек яхши муомалада экан. Дарвоқе, у менга операторлик қилаётганини ҳам айтиб ўтишим керак :). 

Тўрабек Ҳабибуллаев жуда қувноқ йигитлиги, ҳазил-мутойибага усталиги эътиборимни тортди. Қолаверса, ўзгача кепка кийиш имиджи ҳам ўзига ярашган.

Акмалжон Исроилов эса ичимдагини топ деганлардан экан. Лекин уни ҳам гапиртиришни йўлини топдим. Ҳарқалай, Андижоннинг Қўрғонтепа тумани, Дехқончек қишлоғидан, Иқболжон Холдаровнинг қўшниси эканлигини билиб олдим-ку...:).

Фазлиддин Эркинбоев табиатан уятчанроқ экан-у, лекин "Бура"ни яхши ўйнаркан. Ҳар ҳолда, у билан 1:1 натижа қайд этиб турибмиз. 

Дарвоқе, Истанбулга парвоз мобайнида Озодбек Алиев билан ёнма-ён келдик. Ажойиб йигит. Мақсади жиддий. Янги жалб этилган ёшларда бироз ҳаяжон бор. Аммо кўзлари ёниб турибди.Иштиёқ юқори. Яна бир жиҳат қозоғистонликлар билан бизни йигитларни муносабатлари аъло даражада эканлиги ҳам эътиборимни тортди.

 Бир сўз билан айтганда, илк кундаги таассуротлар шулардан иборат. Бизни кузатишда давом этинг, қизиғи ҳали олдинда...

©️ Ахмадбек Эшматов. Ўзбекистон бокс федерацияси матбуот хизмати бошлиғи / жамоа менежери (Манба: Ўзбекистон бокс федерацияси матбуот хизматидан).