Сиёсий можарони қўзғаган Родри ва Ямал, "калла қўйган" Энцо - чемпионликни нишонлаш чоғида черарадан чиққан футболчилар

2024 йил терма жамоалар миқёсидаги йирик турнирга бой ўтди. Йил аввалида футбол ишқибозлари Осиё кубогини томоша қилишган бўлса, инюь ҳамда июль ойларида параллел бўлиб ўтган "Евро-2024" ва "Копа-Америка" турнирлари мухлислар диққат марказида бўлди. 

Жумладан, океан орти давлатида ўтказилган Америка Кубоги ўйинлари ҳам бир қанча ёрқин воқеа-ҳодисаларга бой тарзда ўтди. Бу турнирда 33 ёшли Ҳамес Родригес 6 та ассисти, 4 та “Man of the match” совринлари билан ўзининг иккинчи ёшлигини ўтказгани, "Олтин тўп"га асосий даъвогар Винисиус Жуниорнинг мусобақани эрта тарк этгани каби эътиборга молик ҳодисалар билан ёдда қолди. Бироқ гуруч курмаксиз бўлмайди, деганларидек ҳамма кутилмаган воқеалар турнирлар якунига етгандан сўнг бошланди. 

Аввалига январдаги мусобақа атрофида жуда кўп гап-сўзлар бошланиб кетди. Бутун турнир давомида ҳакамларнинг мезбонларга очиқдан-очиқ ён босиши, кетма-кет иккинчи чемпионлик уларга сотиб олиб берилганлиги каби миш-мишлар бора-бора ҳамманинг наздида айни ҳақиқатга айланиб бораётгандек кўринди. 

“Кўхна қитъа”даги турнирда барчаси жой-жойида кетаётгандек кўринди. Бироқ финалнинг эртаси куни пойтахт Мадридга қайтиб, чемпионлик парадини нишонлаётган пайти футболчилар барчасини ҳаддан ташқари ошириб юборишди. Родри ва Ламин Ямал қўшиқ айтиб, чемпионликни нишонлаш чоғида воқеларга сиёсий тус бериб юборди. Аниқроғи, Гибралтар орол давлатини Испания мулки деб аташди. Мазкур вазиятдан хабар топган Гибралтар футбол ассоциацияси дарҳол УЕФАга шикоят аризаси йўллади. Улар вазиятни атрофлича ўрганиб, ижобий ҳал этишга умид билдиришди. 

Эслатиб, ўтамиз Гибралтар ороли ҳозирги кунда ҳуқуқий жихатдан Буюк Британияга тегишли ҳисобланади. Орол ҳудудида британияликларнинг амалдаги барча қонун-қоидалари тегишли ҳисобланади. Уларнинг фуқаролари бирдек Британия фуқаролари ҳам хисобланади. Аммо шу миттигина орол асрлар давомида айнан Буюк Британия ва Испания ўртасидаги доим баҳс-мунозараларга сабаб бўлиб келадиган ҳудуддир. Олис 1713 йилда икки гигант давлат ўртасидаги урушданг сўнг бу орол инглизларнинг тўлиқ назорати остига ўтган. Хуллас, Родри ва Ямалнинг билиб-билмай айтиб қўйган мазкур сўзлари ҳали Испания терма жамоаси ва умумий қироллик давлати учун бош оғриқ бўлиши мумкин. 

Ниҳоят, мақоланинг асосий антиқахрами ҳақида сўз юритамиз. Аргентина ва Колумбия ўртасидаги "Копа Америка" финалидан сўнг Буэнос-Айрес кўчаларида байрамни нишонлаётган футболчилар орасида ирқчилик кайфиятини юзага чиқарганлари пайдо бўлди. Энцо Фернандес автобусда кетаётиб айнан ирқчилик мазмунидаги қўшиқ куйлайди. Энцонинг "Челси"даги француз жамоадошлари Аксел Дисаси, Мало Гюсто ҳамда Уесли Фофана унинг  ўша қўшиқдан кейин уни инстаграмдан кузатишни тўхтатди.


 
Қўшиқ мазмуни қуйидагича эди: “Улар Франция терма жамоасида ўйнашади, аммо асли Анголадан. Унинг онаси жазоирлик, отаси камерунлик. Аммо паспортида "француз" ёзилган”.

Франция футбол федерацияси ҳам шундан сўнг Аргентина терма жамоаси устидан ФИФАга шикоят жўнатди. Федерация президенти Филипп Диалло ушбу ҳолатни кескин қоралаб чиқди ва Аргентина терма жамоаси аъзоларини ирқчилик ҳамда дискриминацияда айблади. Гарчи, Энцо бироздан кейин эфирни узиб қўйган бўлса ҳам видеодаги айнан ўша қўшиқ айтилган жойи ОАВда тарқалиб кетди. 

Буларнинг барини умумлаштириб айтишимиз мумкинки, чемпион бўлган терма жамоа аъзолари асло ўзини бундай тутиши керак эмас. Ғалабани нишонлаш чоғида чегарадан чиқиш ва бировнинг шахсий сарҳадларини кесиб ўтиш керак эмас. 


 

Ҳумоюнмирзо Эргашев мақоласи