Шомуродовда айб йўқ...

Италия А Серияси қизғин паллага кирди. Кучли клублар Европа Чемпионлар лигаси йўлланмалари ва совринли ўринлар учун курашмоқда. Яна тўртта клуб юқори лигада жойини сақлаб қолишга ҳаракат қилмоқда.

Элдор Шомуродов тўп тепаётган “Женоа” эса бу гуруҳлар орасида жойлашган ўртамиёна клублар қаторига қўшилди. Генуяликлар юқори ўринларга даъвогар эмас ва хавфли ҳудуддан ҳам етти очкога узоқда турибди.

Давиде Баллардини жамоа ўйинини кучайтира олгани рост. Бироқ, генуялик мухлислар сўнгги икки учрашувда “Интер”дан учралган мағлубият ва ўз майдонида ашаддий рақиб – “Сампдория” билан дурангни ҳеч ҳазм қила олмаяпти.

Тўғриси, Италиянинг энг даҳшатли дербиларидан ҳисобланган “Женоа” – “Сампдория” тўқнашувидан кейин мезбонларнинг танқидга учрамаган футболчиси қолмади. Хусусан, Элдор Шомуродовга ҳам муносабат икки хил бўлмоқда.

Адолат юзасидан, эътиборингизга “Женоа” фанатларининг ўзбек ҳужумчиси ҳақидаги ҳам салбий, ҳам ижобий фикр-мулоҳазаларини ҳавола этамиз.

Samuele Batini:

Борган сари ўйинимиз пасайиб кетмоқда. Қатъий қарор қабул қиладиган вақт кетди. Элдор Шомуродов ва Марко Пьяца даражасидаги футболчилардан қутулиш керак.

Andrea Mercatelli: (Samuele Batini фикрига жавобан)

Пьяца бўйича фикрингизга тўлиқ қўшиламан. Бу футболчи “Ювентус”га ўтганидан кейин ўсишдан тўхтагани рост. Шомуродов катта салоҳиятга эга ва ҳали А Серия юлдузига айланади!

Dimitri Falciani:

Чемпионатнинг катта қисми ортда қолганида ёзги трансферлар мавсумида ўзимизга тўғри келмайдиган ўйинчиларни олганимиз маълум бўляпти. Маттиа Бони, Франческо Кассата, Элдор Шомуродов ҳали ишончни оқлагани йўқ. Энг яхши янги ўйинчи эркин агент сифатида текинга олинган Маттиа Дестро бўлиб турибди. “Женоа” раҳбариятига футболчиларга пул сарфлашни тақиқлаб, эркин агентларни топишни юклаш керак.

Niccoló Raspanti:

“Сампдория” билан бўлган учрашувдан келиб чиқиб, таркибда бир неча ўзгаришлар қилиш керак. Йўқса, “Рома”га қарши ўйинда имконимиз бўлмайди. Зайц ва Шомуродовни учрашувга туширмаслик керак. Дестро ҳам ўйнамасин, у жуда ёмон формада.

Luciano Bistondi:

Ҳужумчиларимиз гол уришдан тўхтаб қолди ва бу катта муаммо. Дестро “Кротоне”га, Горан Пандев “Наполи”га иккитадан гол урди. Шундан бери тўртта учрашув ўтказилди. Бу иккиси ҳеч нарса қила олгани йўқ. Шомуродов бир марта гол урди, Пандев ва Дестро дарвозани тўғри нишонга ололмаяпти.

Luca Pollio:

Дербини эсласам, Элдор жамоавий ўйиндан четда қолаётгани кўриняпти. Бунақада, уни захирага ўтказиш керак.

Andrea Righeschi: (Luca Pollio фикрига жавобан)

Жамоа ҳозир ҳужумда ёмон ўйнаётганига Шомуродов айбдор эмас. Ярим ҳимоячиларимиз олдинга яхши пас бера олмаяпти. Бунда Элдор, Дестро ёки бошқа футболчиларнинг умуман айби йўқ.

Кўриниб турибдики, мухлисларнинг “Женоа” футболчилари, хусусан, Элдор Шомуродов борасидаги фикрлари турлича. Футбол ишқибозлари ўйинчиларга баҳо беришда асосан ҳиссиётга таянади. Айниқса, италияликлар ҳиссиётга берилувчан миллат ҳисобланади. Бугун танқид қилаётганлар эртага битта голдан кейин позициясини ўзгартириши ҳеч гап эмас.

Шомуродов эса жамоадошлари билан 7 март куни Римда бўладиган “Рома”га қарши учрашувда тайёрланмоқда. Беллашув Тошкент вақти билан 16:30да бошлашади.  

“Шомуродовни “Женоа”дан ҳайдаш керак!”

Шомуродов босим уюштирди!