Шомуродов Месси билан бир лигада ўйнаши ростми?
- 3-январ 2022, 10:15
- Zohir Toshxo’jayev
- 0
- Футбол
Юртимизда фаолият юритувчи upl.uz сайти “Рома” ва Ўзбекистон ҳужумчиси Элдор Шомуродовга Франция чемпионати юқори дивизионида ўйнаётган “Монако” клубидан қизиқиш бўлаётгани ҳақида хабар тарқатди.
Мазкур сайтнинг ёзишича, францияликлар қишки трансферлар вақтида ҳужум чизиғини кучайтирмоқчи ва Шомуродов “Монако” раҳбариятининг шорт-листидан ўрин олган. Бу жамоа легионеримизни кейинчалик сотиб олиш ҳуқуқи билан январда ижарага олишни режалаштираётгани айтилган.
Шунингдек, upl.uz сайти “Рома” бошқа позицияларни кучайтириш учун Шомуродовдан воз кечиши мумкинлиги ҳақида ёзмоқда.
Таъкидлаш лозимки, Элдор Шомуродовнинг фаолиятини кенг ёритиб бораётган Россия ва Италия оммавий ахборот воситаларида “Монако”нинг ўзбек футболчисига қизиқаётганига оид хабар ҳозирча кўзга ташлангани йўқ.
Аввал Европанинг кўп нашрлари Элдор Шомуродовга Испания Ла Лигаси вакили “Севилья”дан қизиқиш бўлгани ҳақида маълумот тарқатган эди.
Шомуродов Италия чемпионатида "Ювентус" шарафини ҳимоя қилган Криштиану Роналдуга қарши ўйнаган эди. Агар "Монако" варианти рост бўлиб чиқса ва ҳамюртимиз уни қабул қилса, Франция чемпионатида Лионель Месси билан рақобатлашишига тўғри келади.
Буёғини эса вақт кўрсатади...
Моуриньо ўзи синдирган футболчига харидор
Жозе Моуриньо “Тоттенхэм”ни бошқарган даврда ушбу клуб тарихидаги энг қиммат трансфер эгаси Танги Ндомбеле билан келиша олмай қолган эди.
Лондонликлар франциялик ярим ҳимоячини 2019 йили “Лион”дан 60 миллион еврога харид қилганди. Португалиялик мутахассис юзага келган келишмовчилик туфайли қимматбаҳо ўйинчини майдонга туширмай қўйган.
Кейинчалик ўзаро муносабатлар яхшиланган бўлса-да, Танги Ндомбеле аввалги даражада ўйин кўрсата олаётгани йўқ. Моуриньодан кейин “Тоттенхэм”ни шуғуллантираётган Антонио Конте ҳам франциялик ўйинчига ишонч билдирмайди.
Ндомбеле жорий мавсумда майдонда атиги тўққиз марта кўриниш берди холос. Қизиғи, унга Жозе Моуриньо бошқараётган “Рома” харидор бўлмоқда. Жозе Моуриньо Ндомбеле Рим клубининг майдон марказидаги ўйинини кучайтиришига умид қиляпти.
Айни пайтда “Тоттенхэм” асосий таркибидан четда қолаётган ярим ҳимоячининг нархи икки баробарга арзонлаб, 30 миллион евро атрофидаги суммани ташкил қилаётгани ҳам римликларга қўл келиши мумкин.
Шунингдек, майдон марказини тартибга солишни режалаштирган Моуриньо рўйхатида “Марсель” вакили Бубакар Камара ва “Хоффенхайм” аъзоси Флориан Гриллич ҳам бор. Бироқ ёзда эркин агентга айланаётган бу ўйинчиларни олиш осон бўлмайди. Чунки уларга “Рома”дан бошқа клублардан ҳам талаб бўляпти.
“Фиорентина”га “Рома” ҳимоячиси керак
“Фиорентина” раҳбарияти “Рома” ҳужумчиси Борха Майоралдан ташқари истеъдодли ҳимоячи Мараш Кумбуллага ҳам қизиқиш билдирмоқда.
21 ёшли албаниялик ҳимоячи ҳар доим ҳам римликлар таркибига кира олмаяпти. Жозе Моуриньо камдан-кам ҳолларда уни ўйинга қўшмоқда.
“Фиорентина” бу вазиятдан фойдаланиб, Марашни ўз сафига чорламоқда. Мараш Кумбуллага аслида А Сериянинг бир неча клубларидан чорлов бўлган. Бироқ, бу ҳимоячи “Рома” спорт директори Тьяго Пинтога учраб, жамоада қолиб, асосий таркибга кириш учун курашишини маълум қилганди.
“Милан”га жўнатилган ўйинчи Римга қайтмоқчи эмас
“Рома” раҳбарияти томонидан “Милан”га ижарага берилган Алессандро Флоренци ортга қайтмоқчи эмас.
Римликлар билан 2023 йилнинг ярмигача давом этадиган шартномага эга ўнг қанот ҳимоячиси Миланда қолишга ҳаракат қилмоқда. 30 ёшли футболчи “Милан” клуби мутасаддилари мавсум якунлангач, унинг трансфер ҳуқуқи “Рома”дан сотиб олинишига умид қилмоқда.
Флоренцининг “Милан” мураббийлар штаби ва ўйинчилари билан муносабати жуда яхши. У жамоа таркибида А Серияда 12 та учрашувда майдонга тушиб, битта гол уришга ҳам эришди. Шунингдек, Европа Чемпионлар лигасида тўрт марта кўриниш берди.
Унинг “Милан” билан ижара шартномаси мавсум охирида якунланади.
