Шомуродов ҳақида яхши хабар!
- 21-феврал 2024, 07:25
- Zohir Toshxo’jayev
- 0
- Футбол
Ўзбекистонлик футбол мухлисларининг аксариятини Элдор Шомуродовнинг ҳолати қизиқтириши табиий. 28 ёшли форвард уч ойдан бери жароҳатини даволатиш билан овора.
Яқинда Қатар мезбонлик қилган Осиё кубогида ҳам Ўзбекистон миллий терма жамоасининг янада муваффақиятли иштирок этишига Элдор Шомуродовнинг йўқлиги ҳам таъсир ўтказаётганини таъкидлаётганлар ҳам кўп.
Айни пайтда кўпчилик Элдор Шомуродовнинг майдонга қайтишини кутмоқда.
“Кальяри” фаолиятини атрофлича ёритиб келаётган cagliarinews24.com сайти эксперти Лоренцо Ширру ўз манбаларига таянган ҳолда Клаудио Раньери жамоаси ичидаги муҳим ахборотларни тарқатмоқда. Бу мутахассис ўзбек легионери атрофидаги вахиятга ҳам ойдинлик киритди.
- “Кальяри”ни муҳим баҳс – Италиянинг амалдаги чемпиони “Наполи”га қарши учрашув кутиб турибди. Клаудио Раньери жамоасида ҳали мавсумнинг иккинчи ярмида ўйнамаган айри ўйинчилар сафга қайтиши кутилмоқда.
Улар орасида Элдор Шомуродов ҳам бор. Ўзбек ҳужумчиси ўнг оёғидаги жароҳат туфайли майонга туша олмаётган эди. Раньери неаполликлар билан бўладиган баҳсда Элдор Шомуродовга ишонч билдириши мумкинми? Ўйинга ҳали бир неча кун вақт бор. Элдор Шомуродов эса, тез орада гуруҳ машғулотларига қўшилади. Шундай экан, ўзбек легионери камида ўйин қайдномасидан жой олиши кутилмоқда, - деб ёзди Лоренцо Ширру.
Бундан ташқари, яна бир нуфузли манба – L'Unione Sarda нашри ҳам жароҳатидан тўлиқ қутилиш арафасида турган футболчимиз бир ҳафта ичида сафга қайтиши ҳақида маълумот тарқатди.
- Яна озгина сабр қилиши керак. “Кальяри” Элдор Шомуродовнинг қайтиши кутяпти. Сардинияликларнинг “Наполи” билан ўйини 25 февраль куни бўлиб ўтади.
Ўзбекистонлик футболчини яна бир ҳафтага яқин кутиш лозим. Шомуродов А Серияда 11 декабрда “Сассуоло”га қарши ғалабали учрашувда қатнашганидан буён ҳали кўриниш бергани йўқ, - деб ёзди L'Unione Sarda нашри.
Эслатиб ўтамиз, А Серияга қайтган “Кальяри” ёзда Элдор Шомуродовни “Рома”дан бир миллион евро эвазига мавсум охирига қадар ижарага олганди. Сардинияликларда ўзбек легионерининг трансфер ҳуқуқини 9 миллион еврога тўлиқ сотиб олиш имкони бор.
Бироқ Элдор Шомуродов юқори спорт формасига чиқиш учун кўп вақт сарфлаб юборгани боис, “Кальяри”да ҳам захира ўйинчисига айланиб қолди. Эндигина формасини тиклаб, жамоасига самара келтира бошлаган паллада оғир жароҳат олиб, операция қилинди.
Қишки трансферлар ойнаси даврида Элдор Шомуродовни “Салернитина” ўз сафига қўшиб олишга уриниб кўрганди. Салерноликлар трансфер масаласида “Рома” билан келишувга эришди. Ҳамюртимиз ҳам мунтазам ўйин амалиётига эга бўлиш учун жамоасини ўзгартиришга тайёрлиги айтилганди.
Бироқ, “Кальяри” бош мураббийи Клаудио Раньери таркибдаги муаммолар туфайли Элдор Шомуродовни қўйиб юбормагани хабар қилинди. Энди тез орада тажрибали легионеримиз майдонга қайтиши кутилмоқда.