Шомуродов Антонио Конте қўл остида тўп тепиши мумкин
- 24-март 2023, 18:50
- Zohir Toshxo’jayev
- 0
- Футбол
Келаётган ёзда “Рома”да жиддий ўзгаришлар бўлиши кутилмоқда. Улардан энг асосийси Жозе Моуриньо билан боғлиқ.
2021 йили Римга келганидан бери жамоани ижобий томонга ўзгартира олган португалиялик мутахассисга жиддий таклифлар бўлмоқда. Яқинда Жозе Моуриньо Бразилия ва Португалия терма жамоаларини бошқариш учун таклиф этилганди. Гарчи ҳамюртлари Роберто Мартинес олиб келган бўлса-да, бразилияликлар ҳали бу борада якуний қарорга келгани йўқ.
Жозе Моуриньо олдида янги вариантлар чиқмоқда. Чемпионлар лигаси бош совринини қўлга кирита олмаётган ПСЖ жаҳон даражасидаги юлдузларни жамлаган билан бу мақсадни амалга ошириб бўлмаслигини тушуниб етди.
Клуб раҳбарияти юлдузларни жиловлаб, бир мақсад йўлида бирлаштира оладиган қаттиққўл ва ўйинчиларга гапи ўтадиган мураббий олиб келишни режалаштирган. Париж клуби хўжайинлари бу ишни фақат Жозе Моуриньо уддалай олади деган фикрда. Шунинг учун ҳам ПСЖ Моуриньо олдида турган яна бир вариант.
Қолаверса, жаҳоннинг энг кучли клуби ҳисобланган “Реал” ҳам Карло Анчелоттидан воз кечиб, ўн йил олдин клубни тарк этган Жозе Моуриньони қайтаришни ўйлаётгани ҳақида хабарлар чиқа бошлади.
Италиялик мутахассис ўтган мавсумда мадридликларга Испания чемпионати ва Европа Чемпионлар лигаси ғолиблигига олиб келган бўлса-да, клуб хўжайини Флорентино Перес билан муносабати яхши эмас. Шу боис, “Қиролли клуби” унинг ўрнига бошқа мураббий, хусусан, Жозе Моуриньони олиб келишни режалаштирмоқда.
Жозе Моуриньонинг фаолиятидан маълумки, бу мутахассис ўзи истаган футболчиларни сотиб олишга қодир бўлган катта клубларда ишлашни ёқтиради ва ПСЖ ҳамда “Реал” каби грандлар чорловини беэътибор қолдирмайди.
Жаҳон футболи грандларининг португалиялик мураббийга эътибор қарата бошлагани “Рома” раҳбариятини бефарқ қолдираётгани йўқ. Дэн Фридкин қўл остидаги мутасаддилар Моуриньога муносиб ўринбосар топишга киришиб кетган.
Corriere dello Sport нашрининг таъкидлашича, “Рома” раҳбарияти ҳозирги бош мураббий клубни тарк этган тақдирда унинг ўрнига “Тоттенхэм” билан хайралишишга жуда яқин турган Антонио Контени олиб келади.
Контенинг Англия Премьер-лигасидаги фаолияти кўнгилдагидек чиқмади. Аниқроғи, унинг итальянча талаблари Англиядаги футбол юлдузларига тўғри келмади. Жамоа орасида бош мураббийдан воз кечишни талаб қилаётган футболчилар сони тобора ортиб бормоқда.
Антонионинг ўзи ҳам вазиятни тушуниб турибди ва фаолиятини А Серияда давом эттириш бўйича бир қарорга келиб бўлгани айтилмоқда.
Агар бу ўзгаришлар амалга ошиб, Конте “Рома”га устозлик қиладиган бўлса, Элдор Шомуродовнинг кейинги фаолияти айнан унга боғлиқ бўлиб қолади. Чунки, Моуриньо томонидан ўйин амалиётини ошириш учун “Специя”га ижарага жўнатилган легионеримиз мавсум якунланганидан кейин яна Римга қайтади.
Айнан ёзда Элдор Шомуродовнинг “Рома”да қолиш ёки қолмаслиги ҳал бўлади. Бу жараёнда асосий ва якуний қарорни бош мураббий айтиши лозим.