Самвел Бабаян: "Керакли натижага эришиш учун максимал даражада ҳаракат қиламиз"

“Андижон”нинг Ўзбекистон U21 термасига қарши ўтказилган ўртоқлик учрашувидан кейин бош мураббий Самвел Бабаян клуб матбуот хизматига қуйидагича фикр билдирди:

- Бугунги ўртоқлик учрашуви олдимизда турган Осиё Чемпионлар лигаси ўйини олдидан охирги тайёргарлик босқичи бўлди. Чемпионат якунланганидан кейин йигитларга 5 декабргача хордиқ бергандик ва шу санадан тайёргарликка киришганмиз. Албатта, таркибимизда муаммолар бор эди, жумладан, жароҳатланганлар бир нечтани ташкил қилади. Қийин мавсумдан кейин жароҳат олганлар 2-3 кун олдин кўшилишди, оптимал таркибни шаклантира олмадик. Шундай бўлса-да, шу ўйинлар орқали имкониятларимизни кўриб олдик. Йигитлар талабларимизни аъло даражада бажаришди, айниқса, “Бунёдкор” билан бўлган чемпионатдаги охирги баҳсда яхши ўйин намойиш этишимизни шу ўйин орқали намойиш этишди.

Эртага Қатарга жўнаб кетамиз ва у ерда 4 кун машғулот ўтказамиз. Шу орқали “Ал-Аҳли”га қарши учрашувга тайёргарлик кўрамиз. Умуман олганда, жамоамизнинг тайёргарлиги яхши ўтди. Керакли натижани қўлга киритиш учун яхши ўйин кўрсатишга ва мухлисларимизни хурсанд қилишга ҳаракат қиламиз.

Бир нарсани аниқ айта оламанки, жамоадаги ҳамма, ўз ишимизга профессионалларча максимум ёндашиб ҳаракат қилсак, албатта, натижага эришамиз. Йигитлар профессионал. Улар ўйинга жуда яхши тайёргарлик кўришди ва керакли натижага эришишга бор кучимиз билан максимал ҳаракат қиламиз. Мураббийлар штаби билан йигитларга мотивация берадиган услублар устида ишламоқдамиз.

Вилоят ҳокими Шуҳратбек Қўшоқбоевич ҳам жамоа билан учрашиб, йигитларга яхши мотивация бердилар. “Бунёдкор” билан ўйиндан хурсанд бўлиб, шундай руҳда ўйнашимиз кераклигини айтиб ўтди. Таъкидлаб ўтганимдек, эртага Қатарга жўнаб кетамиз ва 4 кун шуғулланамиз. 24 декбарь кунги ўйинга ҳаммамиз оптимал таркибда бўламиз ва Худо хоҳласа, ижобий натижага эришамиз", - деди Самвел Вячеславович.