Рўзиқул Бердиев: Кубок учун жуда қаттиқ "ёнаётганимиз" йўқ

Ўзбекистон Кубогидан ўрин олган "Пахтакор" - "Насаф" учрашуви мезбонлар фойдасига 6:3 ҳисобида якунланди. Ўйиндан сўнг "аждарлар" бош мураббийи Рўзиқул Бердиев матбуот анжуманида иштирок этди.  

- Бугун ҳақиқий кубок баҳси бўлди, деб ўйлайман. Кубок ўйинларида кўп гол бўлади. Биз хато билан ўйинни бошладик. Учрашув бошида 2:0 катта ҳисоб, бироқ биз ўйинга қайта олдик. Ҳисоб 3:3 бўлганида пенальти кўриб чиқилиши лозим эди. Бундан кейин Алибек қизил олди ва бизни оғир ҳолатда қолдирди. Бугун мағлуб бўлдик, "Пахтакор" жамоасини кейинги босқичга йўл олгани билан табриклайман.

- Жамоа қаторасига иккинчи мавсум Ўзбекистон кубогида гуруҳ босқичида қолиб кетди. Ўтган мавсум жамоа мамлакат чемпиони бўлганди. Бу йил эса жамоалар анча кучайди. Жамоа кубокни қурбон қилиши қанчалик таваккалчилик бўлди?

- Кўриб турганингиздек, биз кубок учун жуда қаттиқ "ёнаётганимиз" йўқ. Албатта, гуруҳдан чиқишни хоҳладик. Бугун ҳам биз кўплаб захирадаги футболчиларни майдонга туширдик. Шунингдек, биз Элит ОЧЛда ўйнаймиз, баъзи ўйинлар бир хил вақтга тўғри келиб қолиши мумкин. Бу эса бизга ортиқча юк бўлади. Бу гапларим билан бизга кубок керак эмас эди, демоқчи эмасман.

- Бугунги учрашувда Олександр Воробей олтита гол ўтказиб юборди. Биринчи бўлимдан сўнг Неъматовни майдонга туширишингизни кутгандим. Воробейнинг трансфери қанчалик муваффақиятли бўлди? Унинг ҳаракатларига қандай баҳолайсиз?

- Ҳар икки дарвозабон машғулотларда яхши тайёргарлик кўрмоқда. Эсингизда бўлса, у "Хоразм"га қарши учрашувда ҳам майдонга тушди. Ундан олдинги ўйинда Абдувоҳид ҳам хатоларга йўл қўйди. Шунинг экан, қўлимиздаги барча футболчига имконият беришимиз керак. Ҳозир сиз Воробей ҳақида гапиряпсиз. Аслида, у биз учун қимматли футболчи. Биз уни Умид жамоани тарк этганидан сўнг захира учун олганмиз. Бугун нафақат Воробейга, балки, бошқа футболчиларга ҳам имкон бердик. Бугун мени энг хурсанд қилгани Баҳромовнинг ажойиб ўйини. Менимча, у бошқаларга нисбатан ажралиб турди.

- Бугун дарвозабон хатога йўл қўйгани ҳақида гапирилди. Бироқ ҳужумда ҳам вазиятдан фойдаланишда хатоликларга йўл қўйилди. Бунга майдон ҳолати таъсир қилдими?

- Менимча, бугунги энг катта муаммомиз ҳимоядаги ўйинимиз бўлди. Бугун "Пахтакор"га нисбатан кам гол урган бўлишимиз мумкин, лекин биз бугун 3 та гол " Пахтакор" билан ўйинда яхши. Бу яхши кўрсатгич. Лекин ҳимоядаги ўйинимиз кўплаб саволларни туғдирди.

"Пахтакор"нинг бугунги ўйинидан келиб чиқиб, жамоа Суперлигада ҳам чемпионлик учун курашга қайта олади деб ўйлайсизми?

- "Пахтакор"да жуда яхши таркиб бор. Кўряпсизлар чемпионатимиз қизғин паллада. Кутилмаган натижалар кўп. Ўринлар учун курашадиган жамоалар ҳар йилгига нисбатан кўпайиб кетди. Менимча, энг қизиқ чемпионат бўлади. Мавсумнинг катта қисми олдинда. Бу йил кўп жамоаларда чемпионлик учун имконият бор. "Пахтакор"да ҳам бўлса керак, менимча.

- Жорий мавсум сизда энг кучли ҳужум чизиғи бор. Кўплаб жамоалар бундай ҳужумчиларни орзу қилади. Ҳужумчиларингизни ҳаракатларини қандай баҳолайсиз? Айнан Черанга тўхталсак. У "Пахтакор"да жуда кўп гол урарди. Бу йил вазифаси бироз ўзгаргандек.

- Черан ҳужум ортида ўзини анча яхши ҳис қилади. Биз ундан асосан шу чизиқда фойдаланяпмиз. Ҳар бир ўйинда у максимал ҳаракат қилиб жамоага ёрдам беришга ҳаракат қилябди. Бу йил биласизлар бизни икки нафар ҳужумчимиз Абдухолиқов ва Марушич тарк этди. Уларни ҳам жамоамизга катта ёрдами тегди. Бу мавсум уларнинг ўрнига Норчаев ва Хебайни таклиф қилдик. Бу ҳужумчилар билан мавсум давомида ҳаракат қиламиз.