Ройс ёки Мбаппе? Ким сўнгги мавсумида яна ЕЧЛ финалига йўл олади?

Яна бир Чемпионлар лигаси мавсуми ўз ниҳоясига етаётганини кўриш бироз ёқимсиз ҳолат. Бу йил бизга кўплаб кутилган ва кутилмаган натижаларни тақдим этди. Кўпчилик ярим финалда "Боруссия" - ПСЖ тўқнашуви бўлиб ўтишини ишонмаган бўлса ҳам керак. Айнан мана ўйинда иккала томоннинг ҳам энг катта орзуларидан бири рўёбга чиқиши мумкин. 

 Килиан Мбаппе

Мбаппендан энг аламли мағлубиятингиз қайси, деб савол беришганида у 2020 йилги Чемпионлар лигасини ёдга олади. Томас Тухель ўша пайтда деярли ҳеч ким уддалай олмаётган ишни, яъни Франция клубини финалгача олиб чиқди. Энг қизиғи, парижликларга нимчорак финалида "Боруссия" тўқнаш келган ва немислар мағлуб қилинганди. Кейин "Аталанта", "Лейпциг"ларни таслим қилиб, жамоа финалда "Бавария"га имкониятни бой бериб қўяди. Ягона голни эса собиқ ПСЖ футболчиси ва Килианнинг терма жамоадаги дўсти Кингсли Коман уриб кетади. Ўшанда Мбаппе бу совринга яқинлаша олган. Сўнгги 4 йил ичида биринчи марта унда яна шундай имконият пайдо бўлиши учун ҳаракат қилади. Таъкидлаш жоиз, бугунги ўйин Мбаппенинг "Парк де Пренс"даги сўнгги ЕЧЛ баҳси ҳисобланади. Шундай экан, мухлислар ҳам уни чиройли кузатиб қўйишни исташади. 

Марко Ройс

Садоқат тимсоли сифатида кўриладиган Марко ҳам бир марта Чемпионлар лигасини ютишга яқин келган. 2013 йили ЧЛ финалига "Барселона" ва "Реал" чиқиши мумкин эди. Ярим финалда "Бавария" Гвардиола шогирдларини, "Боруссия" эса мадридликларни таслим қилиб, соврин учун жанг қилишга "Уэмбли"га йўл олишган. Ўйиннинг 89-дақиқасигача ҳисоб 1:1 эди. Иккала томон ҳам экстра-таймларга ўтишга тайёр бўлиб туришганида, Роббен ғалаба голини уриб кетади. Бу "Боруссия"нинг сўнгги ЕЧЛ финали эди. Ўшандан кейин таркибни Роберт Левандовски, Илкай Гюндоган, Матс Хуммельс каби футболчилар тарк этишди. Фақатгина Марко қолди, лекин у ҳам ушбу мавсум сўнггида жамоадан кетмоқда. 

Кичик устунлик дортмундликлар томонида. Аммо ПСЖ ушбу мавсум камбэк қила олганини кўрдик. Шундай экан, тахмин билдириш қийин масала ва энг аламлиси бугун Ройс ёки Мбаппедан қайсидир бири клубидаги сўнгги мавсумида ЕЧЛни қўлга кирита олмаслиги маълум бўлади. Бу ҳам қайғули, ҳам қувончлидир.