Россия ва Қозоғистондаги легионерларимиз гол урди, навбат Италиядаги Шомуродовга!

Ўзбекистонлик футболчилар Европа ва Осиёнинг бир неча лигаларида тўп тепмоқда. Хусусан, Россия ва Қозоғистон чемпионатларида ўйнаётган легионерларимизнинг фаолияти ҳам кўплаб мухлисларимизни қизиқтиради.

Россия биринчи лигаси якунланди. “Рубин” жамоаси биринчи ўринни эгаллаб, келаси мавсумни Премьер-лигада бошлайдиган бўлди. Бу клуб ўзбекистонлик мухлисларга бегона эмас. Айни пайтда қозонликлар сафида Рустам Ашурматов ва Умарали Раҳмоновлиев тўп тепмоқда.

Ҳимоячи Ашурматов “Рубин”жаги дебют мавсумида бешта учрашувда битта гол уришга эришди. Ёш иқтидор эгаси Умарали Раҳмоналиев эса, тўрт марта майдонга тушди. Ҳар икки футболчимиз келаси мавсум юқори дивизионда ўйнаши кутилмоқда.

Биринчи лигадан Премьер-лигага чиққан ўзбек футболчилари  сафи янада кенгайиши мумкин эди. Ҳусайн Норчаев ўйнаётган “Алания” чемпионатни учинчи ўринда якунлади. Владикавказликлар юқори дивизион аутсайдерларидан бирига қарши ўтиш турнирида қатнашиши керак эди. Бироқ, “Алания” клуб Премьер-лига даражасига лойиқ эканини белгиловчи махсус лизенцияга эга бўлмагани боис, жойида қоладиган бўлди.

Биринчи лигадаги яна бир вакилимиз – Вагиз Галиулин чемпионатни гол билан якунланди. “Нефтехимик” сардори сафар учрашувида “КАМАЗ” дарвозасини ишғол қилиб, жамоасининг 2:0 ҳисобидаги ғалабасига катта ҳисса қўшди.

Тажрибали ярим ҳимоячимиз жорий мавсум 29 та учрашувда майдонга тушиб, рақиблар дарвозасини беш маротаба ишғол қилди. Шу тариқа, Вагиз жамоа тўпурарлар орасида олтита гол урган ҳужумчи Константин Базелюкдан кейин иккинчи ўринни эгаллади.

Россия томонларда чемпионатлар якунига етган бўлса, Қозоғистонда мусобақалар қизғин паллага кириб бормоқда.

Қозоғистон Премьер-лигасида Шаҳбоз Умаров ва Бобир Абдухолиқов “Ордабаси”, Игорь Сергеев “Тобол” жамоаси шарафини ҳимоя қилмоқда.

“Тобол” 12-тур учрашувида ўз майдонида “Қизилжар” футболчиларини кичик ҳисобда енгиб, яна юқори ўринлар учун курашга қўшилди. Игорь Сергеев биринчи бўлимни тўлиқ ўтказиб, танаффусдан кейин жойини ивуарлик легионер Серж Деблега бўшатиб берди. Айнан африкалик футболчи ғалаба тўпи муаллифи бўлди.

Игорь Сергеев жорий мавсумда 12 та ўйинда қатнашиб, ўз ҳисобига тўртта гол ёздириб қўйди.

“Ордабаси” футболчилари кучли рақиб – “Атирау” билан тўқнаш келди. Ўз майдонида ўйнаган шимкентликлар катта қийинчилик билан 2:1 ҳисобида ғалаба қозонди. Беллашувда ҳисобни Бобур Абдухолиқов очди. Унга Шаҳбоз Умаров ассистентлик қилди.

 

Ўйин якунланганидан кейин Бобур Абдухолиқов учрашувнинг энг яхши ўйинчисига аталган совринни қўлга киритди.  

Таъкидлаш жоизки, Бобур жорий мавсумда бешта гол ва иккита ассист қайд этди. Шаҳбоз Умаров эса, чемпионатда иккита тўп киритиб, битта голли узатма муаллифи бўлди.

“Ордабаси” 29 очко билан иккинчи ўринда қайд этилган. Бироқ, уч очко фарқи билан биринчи ўринда бораётган “Астана” шимкентликлардан иккита ўйин кўп ўтказган. Демак, қолдирилган ўйинлардаги ғалаба “Ордабаси”ни пешқадамга айлантиради.

УЕФАдаги легионерларимиздан яна бири - Элдор Шомуродов бугун тунда А Сериядаги сўнгги учрашувини ўтказади. Юқори дивизиондаги жойини сақлаб қолиш учун курашаётган "Специя" Римда "Рома" меҳмони бўлади. Қизиғи шундаки, Шомуродов фаолиятида илк бор ўзининг жамоасига қарши ўйнаш имконига эга бўлмоқда. 

Маълумки, Шомуродов асли "Рома" футболчиси ҳисобланади. "Специя" сафида январдан бери ижара асосида тўп тепмоқда. Легионеримиз чемпионат якунланиги билан яна "Рома" ихтиёрига қайтади. 

Олдиндаги баҳсда Элдор Шомуродов "Специя"га ёрдам бериш орқали римликларга ўзининг нималарга қодирлигини яна бир бор кўрсатиб қўйиши талаб этилади.  

Бу терма жамоада Шомуродов йўқ!

Роналду Машариповга нималарни ўргатди?