"Реал"нинг яна бир ҳимоячиси сафдан чиқди

"Реал Мадрид"нинг австриялик ҳимоячиси Давид Алаба жароҳат олди. Бу ҳақда клуб матбуот хизмати хабар берди.

Хабарга кўра, 32 ёшли футболчи жароҳат олган. Алабада ўнг сон мушакларининг шикастланиши аниқланган. Яқин кунларда австриялик футболчи қайта тиббий кўрикдан ўтади ва натижаларига кўра, тикланиш муддати маълум бўлади.

Эслатиб ўтамиз, Давид хоч боғламларининг узилиши туфайли узоқ вақт "қаймоқранглилар" таркибидан жой ололмади. Ҳимоячи 2024 йил охирида умумий машғулотларга қайтган эди. Унинг шартномаси 2026 йилнинг ўрталаригача амал қилади.