“Реал” ва “Интер”нинг тақдири қил устида (превью)

УЕФА Чемпионлар Лигаси гуруҳ босқичига қуръа ташланганда “B” гуруҳи кўпчилик учун якуни маълум тўртлик сифатида намоён бўлганди. “Реал”нинг авлодлар алмашинувидаги муаммолари “Боруссия” Мюнхенгладбах ва “Шахтёр” каби рақибларга қарши ҳам билиниб қолишини кутмаган эдик. “Интер” ёзги трансферлар ойнаси вақтидаги сиёсатидан ЕЧЛда рақобатбардош ва А Сериядаги етакчи жамоа бўлишга ваъда бергандек кўринганди. Аммо бугун уларнинг ҳар икки фронтдаги натижалари ҳам қониқарли эмас. “Боруссия” Мюнхенгладбах ва “Шахтёр” рақиблардаги бўшашишдан ўз вақтида фойдалана олгани билан ҳам эътирофга сазовор. Айниқа, немис клуби ЕЧЛдаги кучли ўйинлари билан эътиборни тортмоқда. 

“Реал” - “Боруссия” Мюнхенгладбах

“Реал”

Тиғиз тақвим остида ўтаётган мана бундай даврда бир футболчига суяниб қолган жамоалар ҳаммадан ҳам кўпроқ нарса ютказиши аниқ. Сабаби, ушбу футболчи тинимсиз равишда асосий таркибда майдонга тушиб, тикланиш жараёнига камроқ вақти бўлади ва жароҳатларга мойиллиги ошади. “Қироллик клуби” ҳам Роналду кетгач, етакчисиз ўйнай оладиган, жамоавий футбол билан натижага эришадиган клуб сифатида кўз ўнгимизда намоён бўлаётганди. Бироқ, уларнинг ўйини бошқа бир “матадор”га боғланиб бораётганини сезмай қолибмиз. Серхио Рамос жамоани том маънода ўтган мавсумда Ла Лига чемпионлигигача етаклаб келди. Бензема кўп жиҳатдан унга ёрдам берганини таъкидлаб ўтишимиз керак. Аммо Кроос, Модрич, Марселодек ветеранлар қатори у ҳам барқарорликдан узоқ юрди. 

Шу пайтгача юқори савияли марказий ҳимоячи сифатида тан олиб келадиганимиз Рафаэль Варан бир ўзи мудофаани эплай олмаслигини арзимаган бир-икки ой ичида кўрсатиб қўйди. Жамоага улкан умидлари билан олиб келинган Эдер Милитаонинг “Шахтёр”га қарши баҳсдаги хатти-ҳаракатлари ҳали-ҳамон мадридликлар ихлосмандларини жиғибийрон қилаётган бўлиши аниқ. Эден Азар ҳақида эса кўп гапирдик - у севимли муолажаларини олишда давом этмоқда. 

“Реал” мухлислари бахтига, бугун Рамос майдонга туша олади. Биз тўлиқ кучдаги “галактикос”ни кўрамиз. Мана шу ҳолда ҳам керакли натижани қайд эта олмаса, улар Европа Лигасини бўйнига олиб, хафа бўлмай ўз устида ишлашда давом этса бўлаверади. 

Тахминий таркиб: Куртуа, Васкес, Варан, Рамос, Менди, Модрич, Кроос, Каземиро, Винисиус, Бензема, Асенсио. 

Иштирок эта олмайди: Вальверде, Азар, Йович.

Сўроқ остида: Карвахаль, Мариано.

 

Зинедин Зидан: “Қийин бўлишини англаб турибмиз. Мен доим позитивман ва ғалаба қозона олишимизга ишонаман. 3 очкони қўлга киритиш учун қўлимиздан келган барча ишни амалга оширамиз. Барча футболчилар ва клублар юқори босим остида ўйнашга ўрганиб қолган. Бу каби ўйинларга ўрганиб қолганмиз. Таваккал қилишга арзийдиган ўйин. Биз эмоцияларимизни жиловлашимиз ва яхши тайёрланишимиз даркор.

Бу Германиядаги баҳсдан фарқ қиладиган учрашув бўлади. Сабаби, вазият бу гал анча ўзгарган. Барча ўйинлар муҳим, аммо айни шу беллашув бизнинг жамоа сифатида қандай кучга эга эканлигимизни кўрсатиб бериши мумкин”. 

“Боруссия” Мюнхенгладбах

Марко Розе шогирдлари бугун Мадридга плей-оффга чиқиб бўлган ҳолда ташриф буюуришлари мумкин эди. Германиядаги беллашувда бир неча дақиқа ичида қўйиб юборилган 2 та гол уларни қимматли 2 очкодан маҳрум этди. Бугунги ўйиндаги тўғри ҳимояланиш ва дуранг натижа ҳам уларни кейинги босқичга олиб чиқиши ҳамда “Реал”ни гуруҳда қолдириб кетиши мумкин. “Шахтёр”га қарши икки учрашувда 10 та гол уришга муваффақ бўлган мюнхенгладбахликлар 5-турда аламли тарзда “Интер”га мағлуб бўлди. 

Германия Бундеслигасида ҳам натижалар бир текисда эмас. Жамоа 10 та тур якунларига кўра, 16 очко жамғарган ҳолда 7-ўринда бормоқда. Лига беллашувларини ҳам солиштирган ҳолда айта оламизки, ушбу клуб иштирокидаги ўйинлар ҳар иккала томоннинг кўплаб голларни киритиши билан ўтади. 

Марко Розе Лильян Тьюрам ва Алассан Плеадан ҳужумда жуда тўғри фойдалана оляпти. Муваффақиятлар калити сифатида ҳам шуни айтишимиз мумкин. 

Тахминий таркиб: Соммер, Лейнер, Эльведи, Гинтер, Вендт, Крамер, Нойхаус, Лаццаро, Штиндль, Тьюрам, Плеа. 

Иштирок эта олмайди: Бенсебаини, Хофманн. 

 

Марко Розе: “Бу каби юқори даражадаги ўйинга “Сантиаго Бернабеу” стадиони кўпроқ мос тушарди. Афсуски, бунинг иложи бўлмаяпти. Жамоамиз ушбу учрашувда тарихий натижани қайд этиши мумкин. “Реал”ни мусобақадан чиқариб юбориш у қадар муҳим нарса эмас. Биз ўз натижамизга эришиш учунгина ҳаракат қиламиз. Рақобатга тайёр ҳолатдамиз ва ўз устунлигимиздан унумли фойдаланмоқчимиз”.

“Интер” - “Шахтёр”

“Интер”

“Неррадзурилар” ушбу баҳсга 3 та кетма-кет ғалаба билан ташриф буюрмоқда. Ҳар учала беллашувда Антонио Конте шогирдлари 3 тадан тўп киритишга муваффақ бўлган. Клуб матбуот хизмати вакили Паоло Мерикуччининг маълум қилишича, бу Лаутаро Мартинес учун миланликлар таркибидаги 100-ўйин бўлади. Бугунги муҳим беллашувда у икки ҳисса куч билан олдинга ташланиши аниқ. 

Бугунги беллашувда “Интер” ярим ҳимоясида йўқотишлар мавжудлиги кўринмоқда. Артуро Видаль ортидан Николо Барелла ҳам 6-турни ўтказиб юбориши мумкин. Бу жамоанинг даниялик ярим ҳимоячиси Кристиан Эриксен учун ажойиб имконият бўлиши мумкин. Шунингдек, Гальярдини ва Брозович майдон марказида Контега манзур келадиган ўйинни намойиш этишга шай ҳолатда бўлиб турибди. 

Яна бир муҳим жиҳат шундаки, жамоанинг асосий қуроли ҳисобланган Ромелу Лукаку таркибда бор ва бу ғалаба калити бўлиши мумкин. 

Сўнгги беллашувларда марокашлик қанот ҳимоячиси Ашраф Ҳакими ҳам эътирофга мос тарздаги ўйинларни намойиш этиб келмоқда. 

Конте ва унинг шогирдларини бугун ғалаба ҳам қаноатлантирмаслиги мумкин. Гуруҳда тақдири ўз қўлида бўлмаган ягона иштирокчи айнан “Интер”!

Тахминий таркиб: Ханданович, Шкриньяр, Де Врей, Бастони, Брозович, Гальярдини, Эриксен, Янг, Лукаку, Лаутаро. 

 

Антонио Конте: “Ҳақиқатга тик боқишимиз шарт - ғалаба қозонишга мажбурмиз. Бир ҳафта олдин деярли имконсиз қолгандик. Энди умид учқунлари бор. Мадриддаги беллашув тақдиридан у қадар хавотирланмаяпман. Бизда бир нечта йўқотишлар мавжуд, айниқса ярим ҳимояда! Видаль биз билан эмас. Аммо ўтган турда усиз ҳам ғалабага эришишни уддалагандик. Ўз кучимизга ишонишимиз зарур”.

“Шахтёр”

Ҳа, “Боруссия” Мюнхенгладбах ҳар иккала ўйинда ҳам донецкликлар билан хоҳлаганини қилди. Бу жиҳатдан уларнинг гуруҳ пешқадами бўлиб тургани тушунарли ҳолат. Бироқ, украин клуби “Реал”ни ҳар иккала баҳсда ҳам мағлубиятга учратгани билан ҳамон плей-офф умидини сақлаб қолган. Бугун Миланга борган таркибнинг ҳеч бирини Европа Лигаси йўлланмаси ҳам қониқтирмаса керак. Улар фақат ғалаба ва кейинги босқич йўлланмаси учун ўйнаши аниқ. 

Аммо кичик муаммо мавжуд. Луиш Каштру жамоасида бир қатор муҳим футболчилар жамоасига ёрдам бера олмайди. Корниенконинг таркибда эмаслиги у қадар катта йўқотиш эмас, аммо Конопльянка, Измаили, Жуниор Мораэс ва Фернандо ҳақида бундай фикр билдира олмаймиз. 

Хочолова ҳамда Детиньонинг аҳволи мавҳумлигича қолаётгани эса “дард устига чипқон” бўлди. 

Ўтган мавсумда Европа Лигаси ярим финалида ушбу клублар тўқнаш келганди ва Милан клуби йирик ғалабани қўлга киритган. Бугун ана шу мағлубият учун ўч олишнинг айни пайти. 

Тахминий таркиб: Пьятов, Додо, Бондар, Витао, Матвиенко, Марлос, Степаненко, Коваленко, Тете, Детиньо, Таисон.

Иштирок эта олмайди: Корниенко, Измаили, Конопльянка, Жуниор Мораэс, Фернандо.

Сўроқ остида: Хочолова, Детиньо. 

 

Луиш Каштру: “Биз консентрацияни тўлиқлигича “Интер”га қаратганмиз. Ғалаба учун қандай режамиз бор? Умуман “Интер”дан фарқ қилмайди: иштиёқ, характер ва кейинги босқич йўлланмасини қўлга киритишга бўлган кучли интилиш орқали. Ҳимояда тартибли ҳаракат қилиш барчасидан муҳим. Футболчиларим ҳам руҳий, ҳам жисмоний тарафдан ўйинга шай ҳолатда. 

Мен мағлубиятлар ҳақида бош қотиришдан кўра, ғалабаларимиз хусусида тўхталишни афзал кўраман. Қўлимиздаги натижалар олдинда кутиб турган баҳсда ҳам бизга таъсир кўрсатиши аниқ. 

Хулоса ўрнида

Юқоридаги мулоҳазалардан келиб чиқиб, Мадриддаги беллашувда “голли қувлашмачоқ” кутишимиз мумкин. Немислар ўйин аввалида бироз темпни пасайтиришга уруниши ва натижа учун ўйнаши аниқ. Бу жараён ёки “Реал” гол ургач, ёки тинимсиз ҳужум қилиб, чарчаб қолганидан сўнггина ўзгаради. 

“Жузеппе Меацца” стадионида бўлиб ўтувчи ўйин эса мезбонларнинг ишончли ҳисобдаги ғалабаси билан якунланадигандек кўринмоқда. Бу қадар катта йўқотишлар билан Каштру шогирдларининг ғалаба қозониши ҳақиқий мўжиза бўларди. Футболда эса мўжизалар учраб туради. 

Нима бўлган тақдирда ҳам, бизни ўта қизиқарли учрашувлар кутиб турибди. Сизда танлов имконияти анча кенг. Шунингдек, ЕЧЛ грандлари иштирокидаги ўйинлар сайтимизда матнли трансляция тарзида эътиборингизга ҳавола этилишини айтиб ўтмоқчиман. 

Абдулвосид Валихонов тайёрлади