"Реал" ҳужумчисига АПЛнинг учта гранди харидор

Мадриднинг “Реал” клуби ҳужумчиси Родриго Испания чемпионатини тарк этиб, Англия Премьер-лигасига ўтиши мумкин. Бу ҳақда "TodoFichajes" портали хабар бермоқда.

Манбага кўра, бразилиялик форвардга Англия чемпионатининг бир нечта топ-клублари қизиқиш билдирмоқда. Гап “Манчестер Сити”, “Манчестер Юнайтед” ва Лондоннинг “Челси” клублари ҳақида бормоқда. “Аристократлар” рақибларини ортда қолдирмоқчи ва футболчи трансфери бўйича аллақачон таклиф тайёрлаб қўйган. Лондон клуби бразилиялик учун 100 миллион евродан ортиқ пул тўлашга тайёр.

Родригонинг Мадрид клуби билан 2028-йил июнь охиригача амалдаги шартномага эга.

Жорий мавсумда 24 ёшли футболчи "Қироллик клуби" сафида 48 та учрашувда 13 та гол ва 10 та ассист амалга оширди.