Мадриднинг “Реал” клубига қишки трансфер ойнаси даврида Англиянинг амалдаги чемпиони “Ливерпуль” билан шартномаси якунланиб бораётган Иброҳим Конатенинг хизматларини таклиф қилишди.
Defensa Central нашри маълумотларига кўра, “Қироллик клуби” франциялик футболчини 20 миллион евро эвазига қўлга киритиш имкониятига эга эди. Бироқ мадридликлар кескин рад жавобини берди.
“Реал” раҳбарияти январь ойида француз ҳимоячисини таркибга қўшиш нияти йўқлигини аниқ билдириб қўйди. Клуб Конатенинг вазиятини ёзда қайта баҳолайди, унинг мавсумнинг иккинчи ярмидаги ўйинларини диққат билан кузатади.
Конатенинг “Ливерпуль” билан амалдаги шартномаси 2026 йил июнь ойи охирида тугайди. 26 ёшли марказий ҳимоячининг трансфер қиймати ҳозирда 50 миллион еврога баҳоланмоқда.