“Реал” Алонсони истеъфога чиқармоқчи. Ўрнига аниқ номзод бор

Мадриднинг “Реал” клуби яна Ла Лигада ғалаба қозона олмади. Бу сафар мадридликлар “Жирона” майдонидаги учрашувда Килиан Мбаппенинг голи эвазига мағлубиятдан базўр қутилиб қолди.

Қимматли икки очко йўқотилганидан кейин мадридликлар мусобақа жадвалининг биринчи поғонасини ашаддий рақиб – “Барселона”га бўшатиб берди.

Журналист Пепе Альвареснинг маълум қилишича, “Қироллик клуби” раҳбарияти бир неча учрашувга чўзилган ғалабасиз сериядан кейин бош мураббий Хаби Алонсони истеъфога чиқариш имкониятини кўриб чиқмоқда. Испаниялик мутахассиснинг тақдири яқин орадаги ўйинлар натижасига кўра ҳал бўлади.

Флорентино Переснинг кўз ўнгида унинг ўрнига келиши мумкин бўлган ягона номзод – Зинедин Зидан бор. Франциялик мутахассис бунгача икки бор жамоани муваффақиятли бошқарган. Зиан 2021 йили Мадрид клубини тарк этганидан бери ишсиз юрибди.

Зинедин Зидан “Реал”ни икки марта бошқарган даврда кетма-кет уч марта (2016, 2017, 2018 йилларда) УЕФА Чемпионлар Лигасида ғолиб чиққан ягона мураббий сифатида тарихга кирган. Унинг учинчи марта жамоага қайтиши мухлислар учун ҳам, раҳбарият учун ҳам катта умидларни уйғотиши мумкин.