Расман! "Атлетико" дарвозасини ишғол қилган дарвозабон "Лацио" билан шартномасини узайтирди

"Лацио" дарвозабони Иван Проведел клуб билан шартномасини узайтирди. Бу ҳақда римликлар матбуот хизмати хабар берди. 

Янги келишувга кўра, футболчи 2027 йилга қадар "бургутлар" сафида тўп тепиш ҳуқуқига эга бўлади. Шунингдек, Иваннинг маоши сезиларли ошгани ҳам айтилмоқда. 

Эслатиб ўтамиз, Проведел чемпионлар лигаси жорий мавсумида "Атлетико" дарвозасини ишғол қилганди. Айнан унинг сўнгги дақиқаларда урган голи сабаб Рим клуби 1 очкони қўлга киритганди.

Маълумот ўрнида, Иван А Сериянинг 25 баҳсида 26 гол ўтказиб юборган. Қолаверса, посбон 9 та учрашувда дарвозаси даҳлсизлигини сақлаб қолган.