"Рақибдан кучлилигимизни исботлаш учун бор кучимизни кўрсатишимиз керак". Рўзиқул Бердиев ва Жавоҳир Сидиқов яна нималарни айтдилар?

Эртага “Насаф” клуби ОЧЛ 2 доирасида Қувайтнинг “Қувайт СК” жамоасини қабул қилади. Учрашув олдидан бугун матбуот анжумани бўлиб ўтди. Унда “Насаф” бош мураббийи Рўзиқул Бердиев билан бирга футболчи Жавоҳир Сидиқов қатнашди.

Рўзиқул Бердиев: - Эртанги рақибимизни биламиз. Улар билан бир ўйин ўтказдик. Маҳоратли, тажрибали ўйинчиларга эга жамоа. Улар ҳақидаги маълумотларни янгиладик ва йигитларга етказдик. Бу учрашув биз учун жуда муҳим. Шу боис беллашувга жиддий ёндашамиз.

Жавоҳир Сидиқов: - Мураббийимиз таъкидлаб ўтганидек, бизни яхши жамоага қарши ўйин кутмоқда. Худо хоҳласа, жамоадошларимиз билан 100 фоиз баҳсга тайёрмиз. Бизда йил якунланиб боряпти. Ўз майдонимизда мухлисларимиз қаршисида максимал ўйинимизни кўрсатиб, ғалабани тақдим этиб мухлисларни хурсанд қилиш мақсадидамиз.

- “Қувайт СК” бош мураббийи иккала жамоани кучини тенг баҳолади. Рақибни кучли томонларини нимада деб биласиз?

- Мураббий тўғри таъкидлаган. Гуруҳимизда ҳақиқатда тенг кучли жамоалар йиғилишган. Булар ўз мамлакатининг етакчи жамоалари ҳисобланадилар. Балки шуни ҳисобга олгандир. Уларга қарши биринчи ўтказган учрашувимизда жамоалар бир-бирига муносиб эканлиги кўринганди. Шу боис шу фикрни билдирган. Қанчалик муҳим ва жиддий бўлмасин ўйлайманки ўйинга тайёргарлигимизни яхши олиб бордик. Йигитлар ҳам учрашувнинг нечоғли аҳамиятли эканлигини тушуниб туришибди. Эртанги беллашувда албатта натижа учун ҳаракат қиламиз. Рақибдан кучлилигимизни майдонда исботлаш учун бор кучимиз ва меҳнатимизни кўрсатишимиз керак бўлади.

- Қувайтдаги ўйинда дуранг натижа қайд этилган. Ўша ўйиндаги имкониятлардан нима учун фойдаланилмади? Таҳлил қилиб чиқдингизми?

- Биз ундан кейин яна 3 та ўйин ўтказдик. Эсласанглар, Қувайтдаги биринчи учрашувда дурангга эришгандик. Ўшанда тўлиқ таркиб билан бормагандик, буни яхши биласизлар. Уларни ўрганишга келсак, ҳар бир жамоада 10 та эмас, 20 дан зиёд ўйинчилар бўлади. Жамоа сафида тажрибали терма жамоа ўйинчилари ва легионерлари бор. Ҳар учрашувда ҳар хил таркибда майдонга тушиш мумкин. Баъзида тактик схемаларни ўзгартириб туриш мумкин. Рақибни билган ҳолатда биз кўпроқ ўз ўйинимизга эътибор қаратишимиз керак.

- Иккита ўйинда ғалаба қозонса “Насаф” кейинги босқичга чиқади. Футболчиларни кайфияти қандай?

Жавоҳир Сидиқов: - Албатта, бу халқаро майдон. Биз ички чемпионатда олдимизга қўйилган мақсадимизга эришдик. Охирги ўйинларни омадсиз ўтказганимизгами, танқидлар бўлди. Ишонтириб айта оламанки, эртанги бўладиган учрашувда бор кучимизни ишга соламиз. Биз Ўзбекистон номидан иштирок этамиз ва муносиб ҳимоя қилишга ҳаракат қиламиз. Биз ўз майдонимизда мухлисларимиз қаршисида ўйнаймиз. Кайфият аъло даражада. Бундан олдинги ўйинлардаги натижалар таъсир қилмайди, деган умиддаман. Бор кучимиз билан ҳаракат қиламиз.