Рафинья: "Олтин тўп"ни ютиш менинг асосий мақсадим эмас

"Барселона" етакчиси Рафинья "Олтин тўп" учун даъвогарлар қаторида эканлиги ҳақида ўз фикрларини билдирди. Футболчининг айтишича, нуфузли совринни қўлга киритиш унинг мақсади эмас.

"Мен бунга ортиқча эътибор қаратмасликка ҳаракат қиламан. Мавсумни қандай бошлаган бўлсам, шундай давом эттиришга, ўша диққатни, ўша мақсадларни сақлаб қолишга интиламан.

Шубҳасиз, менинг шахсий мақсадларим бор, уларга эришишга ҳаракат қиламан. Лекин, очиғини айтганда, "Олтин тўп" мен учун асосий мақсад эмас. Менинг мақсадларим – голлар уриш, голли узатмалар бериш, "Барселона" ва Бразилия терма жамоаси билан совринларни қўлга киритиш. Агар клуб ва терма жамоада ишлар яхши кетса, табиийки, футболчилардан бири ажралиб туради.

"Олтин тўп" учун асосий номзодлардан бири эканлигимнинг ўзи менинг футболчилик фаолиятим давомида бошдан кечирганларимни ҳисобга олганда катта ютуқдир. Бу мукофотга даъвогарлик қилишнинг ўзи ҳам ғалаба.

Мен бунга кўп ўйланиб ўтирмайман, бутун диққатимни фақат футболга қаратаман. Ўйиндан ўйинга, машғулотдан машғулотга олдинга интиламан." – деди "Барселона" ва Бразилия терма жамоаси вингери.

Рафинья жорий мавсум барча мусобақаларда 27 та гол ва 20 голли узатма амалга оширди.