"Қўқон-1912" футболчиси: "Андижон"га қарши тўп суриш хаёлимга ҳам келмаганди"

“Қўқон-1912” жамоаси бу турда сафарда “Андижон” майдонида муҳим уч очкони қўлга киритди. Ушбу беллашувда андижонликларнинг собиқ футболчиси Фарҳод Бекмуродов ўзининг фаол ҳаракатлари билан ажралиб турди. Шу сабабли у ғалаба ниманинг эвазига қўлга киритилган тўғрисида sports.uzга шундай деди:

- Яхши ўйин бўлди. Учрашувда биринчи бўлиб гол урганимиз бизга кўпроқ ёрдам берди, деб ўйлайман. Биласиз, Андижонда футболчи бўлиб етишдим. Футболчилик пайтимда “Андижон”га карши ўйнаш хаёлимга ҳам келмаган. Чунки бу клубда қоламан, ҳеч қаерга кетмайман, деб ўйлардим. Лекин тақдир экан, ризқимизни бошқа жойдан териб юрибмиз.

Кубок баҳсларидаги омадсизликдан кейин бизга ғалаба керак эди, мураббийларимиз ҳам, биз ҳам тушуниб турган эдик, шунинг учун ҳаммамиз ҳаракат қилиб, бор кучимиз билан ўйнадик. Ғалабамизга биринчи бўлимдаги тезкор голимиз ва охирги дақиқадаги голимиз ҳам ёрдам берди.

“Андижон”нинг ўйини яхши. Лекин нимагадир омад етишмаяпти. Бунгача ҳам бўлган ўйинларини кўрдим. Бу жамоага бефарқ эмасман. Насиб қилса, кейинги учрашувларда омади келиб ғалаба қозонишади, деган умиддаман.