“Қўқон-1912” - “Навбаҳор” учрашуви бошқа дербилар ва марказий ўйинлардан томошабоп, деб топилди

16-18 август кунлари Суперлиганинг 16-тури ўтказилди. Натижалар билан сайтимиз орқали хабар бериб бордик.

Ушбу турда бирорта оддий ўйин ўтказилмади. Ҳаммасида ўзига хос қарама-қаршиликлар кузатилди. Яйпанда “Водий дербиси”, Тошкентда икки кунда пойтахтнинг 4 жамоаси ўзаро тўқнашди, Навоийда “воҳа дербиси”, Олмалиқда испанлар дуэли ва Қаршида марказий ўйинлардан бирининг шоҳидига айландик.

Энди эса турга оид қизиқарли маълумотларни тақдим этамиз. Яъни анъанамизга содиқ қолган ҳолда тур мухлислари статистикаси билан таништирамиз.

Бу гал стадионларимизга жами 19726 томошабин ташриф буюрди. Ҳар бир беллашувга ўртача 3288ни ташкил қилади. 

16-турда 6 та ўйин ўтказилди. “Сўғдиёна” - “Нефтчи” баҳси жиззахликларнинг ОФК кубогидаги учрашуви сабаб бошқа санага кўчирилди. ПФЛ матбуот хизмати ушбу беллашув 13 сентябрда ўтказилишини маълум қилди.

Энг кўп мухлис Яйпанда. “Қўқон-1912” вилоятнинг бошқа аренасида "Навбаҳор"ни қабул қилди. Беллашувга 7271 томошабин ташриф буюрди. “Ўзбекистон” стадионига келган мухлислар кетган вақтига ҳеч ҳам ачинмади. Чунки беллашув чиндан ҳам ажойиб ўтди.

Мухлислар ташрифидан келиб чиқсак, қизиқарлилиги жиҳатдан Қаршидаги ўйин иккинчи ўринни эгаллади. “Насаф” - АГМК баҳсини 6235 ишқибоз стадиондан кузатди.

Навоийда кечган баҳс ҳам мухлисларни ўзига тортди. "Қизилқум" - "Динамо" учрашувига 3612 томошабин келди. Шу куни Навоийда Ўзбек футболининг 110 йиллиги тантаналари ўтказилди.

Энг кам ишқибоз Тошкент вилоятида. “Сурхон” стадиони билан боғлиқ масалаларни ҳал этгунга қадар бошқа майдонларда ўйнамоқда. Шу боис термизликлар “Металлург”ни Олмалиқда қабул қилди. Беллашувга 340 ишқибоз ташриф буюрди. Хатто “Тошкент дерби”ларига ҳам мингдан ортиқ томошабин келди.

Қуйида Суперлиганинг ушбу турига ташриф буюрган мухлислар статистикаси билан танишинг (мухлислар сони ПФЛ сайтидан олинди):

“Қўқон-1912” - “Навбаҳор” 1:1. 7271 томошабин

“Насаф” - АГМК 0:0. 6235 томошабин

“Қизилқум” - “Динамо” 4:1. 3612 томошабин

“Пахтакор” - “Олимпик” 1:1. 1212 томошабин

“Локомотив” - “Бунёдкор” 0:0. 1056 томошабин

“Сурхон” - “Металлург” 1:2. 340 томошабин

 

Бекзод ИСАЕВ