Пўлатхўжа Холдорхонов: “Худо хоҳласа, “Андижон”га ҳам чемпионликни ният қилиб келдим”

Янги мавсум учун жиддий вазифалар сари курашишни кўзлаган “Андижон” шу ниятда таркибини кучайтириб боряпти.

Айнан ушбу мақсадда таклиф қилинган футболчилардан бири Пўлатхўжа Холдорхонов бўлиб, 22 ёшли ҳужумчи куни кеча жамоа билан шартнома имзолади ва иқтидорли ҳужумчи клуб матбуот хизманинг саволларига жавоб қайтарди.

- Пўлатхўжа сизни "Андижон" аъзосига айланганингиз билан муборакбод этаман. Шартнома имзоланди ва энди бу борада нималарни айта оласиз?

- “Андижон” жамоасини ва жонкуяр мухлисларини ҳурмат қиламан ва мен бу жамоани аъзоси бўлганимдан хурсандман.

- Ушбу вариантдан кўнглингиз тўлдими?

- Мен ҳар қандай чақирувга тайёр эдим. Лекин вариантлар орасида “Андижон” клуби менга кўпроқ ёқди. Сабаби, ашаддий мухлислар ва тажрибали мураббий.

- "Шўртан" сафида тўпурарлик маҳоратингизни кўрсата олдингиз. Янги мавсумда янада ўзгача иштиёқ сизда сезиляпти. Бу ҳақида нима дея оласиз?

- “Шўртан” жамоасига тез мослашиб кетдим ва мен у ерда ўзимни оптимал формамга чиқа олмадим. Энди-энди оптимал формамга чиқаётган пайтда чемпионат тугаб қолди. “Андижон” катта жамоа ва бу ерда масъулият ҳам кўпроқ, айниқса, ишқибозлар олдида. Худо хоҳласа, тез мослашиб кетаман, деб ўйлайман. Сабаби бизда ҳали икки ой вақт бор ва барча билан бир-биримизни тезроқ тушуниб кетамиз, деб умид қиламан.

- Охирги марта "Пахтакор" билан чемпионликка эришгандингиз. Яна медалларни соғиндингизми?

- Албатта, мен ёшлигимда кўплаб мусобақаларда чемпионликни қўлга киритганман ва ёш бўлишимга қарамасдан Осиё чемпиони, Ўзбекистон чемпиони бўлиш насиб қилди. Худо хоҳласа, “Андижон”га ҳам чемпионликни ният қилиб келдим.

- "Андижон"даги ўзгаришларни кўриб турибсиз ва бу борадаги муносабатингиз бизга қизиқ...

- Бу жужа ҳам қувонали ва менга фақат мотивация беряпти. Айниқса, 2026 йилни Андижон вилояти ҳокими айтганидек, Андижонда футбол йили қиламиз, деганлари ажойиб. Мухлислар ҳам йилдан-йилга кучайиб бораётганлиги мени қувонтиради.

- Ушбу таклифни танлашингизда сизга асосий туртки бўлган жиҳат нимадан иборат бўлди?

- Ушбу таклифни қабул қилишимга асосий турткилардан бири бу тажрибали мураббий ва чемпионликка бўлган интилиш. Шунингдек, албатта “Ультрас Бургут”. Мен “Бобур арена”да уларни қўллаб-қувватлашларини сабрсизлик билан кутаман ва ўйлайманки, мухлисларни ва жамоани ўзимни голларим билан хурсанд қиламан. Олға “Андижон”, олға “Ультрас Бургут”.