Педру Морейра: "Эртага ҳимояда жуда уюшқоқ бўлишимиз керак!"

Хабарингиз бор, эртага "Пахтакор" жамоаси Элит Чемпионлар лигаси доирасида "Ал-Ҳилол" билан ўйнайди. Учрашув олдидан "шерлар" устози Педру Морейра ва ҳимоячи Шаҳзод Азмиддинов матбуот анжуманида қатнашди. 

"Элит Чемпионлар Лигасининг олдинги ўйинларида ўйнаган футболчилар ва ишлаган мурабийларга раҳмат айтаман. Нимчорак финалга чиқишимизда уларнинг ҳам ҳиссаси катта.

Рақиб жуда кучли жамоа. Улар Осиёнинг энг кучли ва совриндор клубларидан бири. Биз имкон қадар мухлисларга ёқадиган футбол кўрсатишга ҳаракат қиламиз.

Жуда кучли рақиб билан ўйнаймиз. Уларнинг сафида юқори даражадаги футболчилар бор. Мураббийи ушбу мусобақадаги мутахассислар орасида энг кўп совринлар ютган. Биз ўз ўйинимизни намойиш қилиб, ғалаба қозонишга интиламиз. "Ҳилол" гуруҳда пешқадам бўлди. Улар турнирда энг кўп вазият яратган, зарба берган ва ўйинни назорат қилишган.

"Пахтакор" беллашувга яхши тайёрланди. Буни кўрсатишга уринамиз. Ҳимояда жуда уюшқоқ бўлишимиз керак. Баҳсга ўз режаларимиз бор. Ҳар қандай ҳолатга ҳозир бўлиш керак. Тўпни шунчаки йўқотмаслик, вазиятлардан фойдаланиш лозим. Рақиб Чемпионлар Лигасини ютишга асосий даъвогарлардан бири.

Футболда кўп нарсалар рўй беради, ўзгаради. Тўп бизда бўлганда ҳужумга ўтишимиз лозим. Рақиб юқори босим қилади, яхши ҳимояланади ва кучли ҳужумкор футболчиларга эга. Ушбу босқичда ғалабани ўйлаган ҳолда ўйнаш керак", - деди португалиялик мутахассис.

"Мураббий рақиб ҳақида бизга айтиб ўтди. Кучли жамоага қарши майдонга тушамиз. Эртага мухлисларни хурсанд қилишга боримизни берамиз.

Ўйинга барча футболчи тайёр. Рақибда юлдузлар, юқори савияли ижрочилар бор. Биз хатосиз ўйнашга, дарвозасимиз дахлсизлигини сақлаб қолишга интиламиз. Жамоа билан ўзимизни кўрсатишга ҳаракат қиламиз. Балки, ҳаво шароити бизга кичик ёрдам бериши мумкин, лекин майдонда барибир 11 нафардан футболчи бўлади", - дея ўз фикрларини билдирди Шаҳзод Азмиддинов.