ЎзПФЛ эмас, ЎзМТРК жавоб бериши керак

Кеча Ўзбекистон Суперлигаси доирасида "Динамо" ўз майдонида "Насаф"ни қабул қилди. Мазкур беллашувда 2:2 ҳисоби қайд этилди ва баҳс бир қанча баҳсли эпизодлари билан эсда қолди. 

Сўнгги йилларда 100 фоиз бўлмаса ҳам кўплаб баҳсли эпизодларга ечим сифатида биз ВАР тизимини биламиз. Унинг футболга кириб келиши ҳакамларга қарор қабул қилишда енгиллик берди. Мисол учун телеграм орқали сиз бирор дўстингизга, гуруҳга ёки телеграм каналингизга хабар юборасиз ва ўша хабарда хатолик бўлса, таҳрир қилиш функцияси бор. Буни билган ҳолда, сизда масъулият автоматик камаяди. Техник томонлари билан камчилик ва хатони тўғрилаш мумкинлиги англаган ҳолда, яъни. 

Худди юқоридаги ўхшатиш сингари ВАР ҳам ҳакамларнинг қарор қабул қилиши учун енгиллик бераётганди. ВАР билан исталган хатони тўғрилаш имкони уларда бор. Бироқ кеча бўлиб ўтган "Динамо" - "Насаф" учрашувида ВАРнинг йўқлиги жамоаларнинг даражаси, чемпионлик курашида таъсир нуқтаи-назаридан олиб қарасак, кўнгилни хира қилувчи ҳолат сифатида узоқ вақт эсимизда қолади. Балки мавсум якунланганидан кейин натижалар сарҳисоб бўлаётган бир пайтда мухлислар шу ўйиндаги техник камчиликни, аслида бўлиши керак бўлган ВАРнинг йўқлигини эслаши табиий. 

Хўш, нима учун мана шундай катта масштабли баҳс ВАРсиз, атиги 2 та камерада (уларнинг ҳам бири телефон) олиб берилди? Аниқки, бу ёндашув эмас. Бу қайсидир томоннинг масъулиятсизлиги ва ўз ишига ўта нопрофессионал ёндашуви, десак адашмаган бўламиз. Айнан қайси томоннинг? 

Мусобақаларни ташкил этишга жавобгар ЎзПФЛ бу каби ҳолатлар учун жавобгарликни ўз бўйнига олиши керак деймиз. Бироқ Ўзбекистон Суперлигаси ўйинларини трансляция қилиш айнан МТРКнинг вазифаси. Ҳозирча Ўзбекистонда техник таъминот нуқтаи назаридан МТРКга алтернатив бўлиб бера оладиган бирор телеканал йўқ. Яқин йилларда бўлиб қолмаса, агар. Шу сабабли ҳам ЎзПФЛ МТРК билан ноиложликдан ишлашга мажбур, менимча. 

ЎзПФЛ билан кечаги баҳсдан сўнг боғландик ва вазиятга изоҳ сўрадик. Билишимизча, кечаги беллашувда ВАР техникаси ҳамда ВАР ҳакамларининг барчаси стадионда бўлган. Фақатгина МТРКнинг Жиззахдан келиши керак бўлган КТС (Кўчма телевизион станцияси) ўйинга келмаган. КТС стадионга келмагани сабаби номаълум ва тушунарсиз. ЎзПФЛ ходимлари улар билан боғлана олмаган. На КТС бошлиғи ва на инженери қўнғироққа жавоб бермаган. 

Яна маълум бўлдики, ЎзПФЛ ҳолат юзасидан Спорт ТВ телеканалидан тушунтириш сўраган ва айни вақтда баёнот кутилмоқда.. Бу тушунарсиз ҳолатга кимдир жавоб бериши шарт. 2025 йилда КТС сотиб олиш учун давлат бюджетидан салкам 108 миллиард ажратилганди.  Агар бу пуллар жойига етиб борган бўлса, мақсадли сарфланган бўлса, қандайдир тадбир ёки фавқулодда вазият бўлмаса, Суперлигадаги атиги иккита параллел ўйинни олиб бера олмаслик, ЎзМТРК учун уят. Футболимизда эса ҳамон яхлит механизм йўқлигидан далолат. 

Шу ўринда, футбол оммабоплиги ва ривожланиши ўртасидаги фарқни айтиб ўтиб кетмоқчиман. Футболи оммабоп мамлакатлар кўп, у ерда аҳоли шунчаки футболни севади. Сабабларсиз, шартларсиз. Футболи ривожланган мамлакат мақомини олиш эса мана шунақа кўплаб деталларни ҳам ўз бўйнига олади. Мана шунақа бир нечта деталлар бир бўлиб, мамлакатда футболни ривожлантиради. Трансляциялар сифати шулар орасида энг муҳим деталлардан бири. Унинг сифатли бўлиши кўпроқ аудиторияни ўзига тортади. Юқоридаги ҳолатлар эса кўнгилни хира қилади ва футболга ошно кўнгилларни ҳам футболдан совута олади.

Ҳа, биз Жаҳон чемпионатига чиқдик. Қоракўзларимиз бизни хурсанд қилди ва футболимиз эртасига умид борлигини исботлашди. Бироқ кечагидақа ҳолатлар кайфиятни яна балансга келтириб қўяверади. Ахир, футболимиз 23 кишилик терма жамоанинг ўзидан иборат эмас-да. Агар шундай бўлгани-да, ҳозир бу гаплар билан бошингизни қотирмаётган бўлардим :) 

 

Карим Худайқулов