"Ўзбекистонда кўпчилик мураббийлар ёшига қарашади, шифокорлар бу оёғинг билан ўйнай олмайсан дейишарди" - бутсаларини михга илган Марат Бикмаев

Ўша сиз ва биз яхши билган Марат Бикмаев расман футболчилик фаолиятига якун ясади. У 37 ёшида бутсаларини михга илганини эълон қилди.

“Локомотив” сафида про лигада “Юниред”га қарши учрашув футболчининг фаолиятида охирги расмий ўйини бўлиб қолди ва ушбу баҳсда Марат охирги голини урди.

Бикмаев фаолиятини тугатгач, Sports.uz сайтига интервью берди.

Маратнинг фаолиятини якунлашига нима сабаб бўлди?

- Ҳеч ким тугатишимга сабабчи бўлмаган, ўзим сабабчиман. Мисол учун ёши катталар нега 40 ёшгача ўйнашади? Агар уларда ўйин амалиёти кўпроқ бўлса, фаолиятини тугатишини ҳожати йўқ. Чунки у рақобатлашяпти, вазифасини бажаряпти. Мана шундай ҳолда фаолиятини ҳали бери тугатмаса бўлади. Ўзимга келсак, ўйин амалиётим унчалик кўп бўлмади. Масалан, битта учрашувда 5 дақиқа ўйнайман, кейин иккита ўйинда ўйнамайман, сўнг яна 15 дақиқага майдонга тушаман. Ўзингизни формада ушлаб туриш, тикланиш жуда қийин. Ўзбекистонда кўпчилик мураббийлар ёшига қарашади. Агар ҳар ўйин ҳеч бўлмаганда бир таймдан ўйнаб турганимда ва ўйин амалиётим кўпроқ бўлганида балки тугатиш ҳақида ўйламасдим. Яна давом эттираверардим. Бу биринчи фактор. Иккинчи фактор барибир ёш ўтган сари майда-чуйда жароҳатлар бўлаверади. Ёшроқ бўлганингизда билинмайди. Лекин ёш улғайган сари сезилади. Тезлик олдингидек бўлмай қолади. Жароҳатлар кўпайиши мумкин. Худога шукр, бу йил умуман жароҳат олмадим. Мураббийимиз жуда маҳоратли, ҳаммани бутун мавсум давомида тонусда ушлаб турди. Шунинг учун рақобат олмасдан рақбатлашиб юрдим.

Тўп сурган клублари орасида ўзи учун энг ёққани қайси?

- Фаолиятимда ёқмаган жамоа бўлмаган. Қаерга борган бўлсам ҳар доим позитив вазиятларни қидирганман. Ҳаммадан озгина-озгина тажриба оширганман. Кимни қандай ишлашини билиб олганман. Тўғри, ҳаммада ҳам камчилик бўлади. Қайсинидир яхши ёки ёмонга ажратмайман. Барчаси ўзига яраша яхши бўлган. Энг ёққан жамоамми? “Локомотив”, албатта! Менда шунақа вазият бўлганки, футболни тугатиш ёки давом эттириш варианти бор эди. Чунки 2013 йили жароҳат олгандим. Оёғимда 4 та операция бўлган. Шифокорлар бу оёғинг билан ўйнай олмайсан дейишарди. Ўша қийин вазиятда “Локомотив” менга имконият берган. Ўша клубда даволандим, бир йилдан кўпроқ вақт давомида тикландим. Шундан кейин ўйнаб кетдим.

Номдор жамоалардан ҳам таклифлар бўлганми?

- Менга таниқли клублардан аниқ таклифлар бўлмаган. Бўлган бўлса ҳам фақат гап-сўзлар тарқаган. Лекин аниқ шартнома таклиф қилинмаган. Менда ҳеч қайси клуб билан боғлиқ афсусланиш бўлмаган.

Қайси таниқли юлдузларга қарши ўйнаган?

- Сонга қарши ўйнадим. Россия терма жамоасида тўп сурган Жирков, Анюков, Денисов, Аршавин, Эрондаги Али Карими...Ўзимизни юлдузлар бор. Одил Аҳмедов билан бирга терма жамоада тўп сурганмиз. Анзур Исмоиловни ҳам айтишим мумкин.

Ушалмаган орзулари

- Ушалмаган орзуларда албатта биринчи ўринда мундиал турибди. Биз яқин эдик. Лекин нимадир етишмади. Терма жамоамизга бу йўлда омад тилайман ва ниҳоят Ўзбекистон албатта жаҳон чемпионатига боради. Чунки бизда яхши имконият бор. Балки кейинги мундиалда квоталар ўзгарар.

Бикмаевнинг кейинги режалари қандай?

- Футболни бутунлай тарк этмайман. Футболдан бошқа ҳаёт менга қизиқ эмас. Бу менинг бир қисмим. Футболда қоламан, аммо қанақа йўналишда ишлашимни билмайман. Балки футбол структурасида ишларман, балки мураббий бўларман. Буни вақт кўрсатади.

Шуҳратбек Жўраев.