Ўзбекистон тўпурарлари нечанчи ўринда?
- 21-апрел 2023, 13:30
- Zohir Toshxo’jayev
- 0
- Футбол
Туркманистоннинг salamnews.tm сайти Марказий Осиё давлатлари миллий чемпионатларида тўпурар бўлган футболчилар сонини ҳисоблаб чиқиб, антиқа рейтинг тузди.
Натижа умуман кутилмаган бўлди. Бешта республика орасида Ўзбекистон ва Қозоғистон футболи қолган минтақадошлардан кучли экани эътироф этилади. Лекин тўпурарлар кўплиги борасида етакчилик бошқа мамлакат томонида.
Туркманистон сайти тузган рейтингдан маълум бўлишича, ушбу мамлакат футболчилари энг кўп – 38 маротаба юқори лига тўпурари бўлган.
Хусусан, туркман футболчилари ўз юртида 34 маротаба, Қозоғистонда икки бор, Ўзбекистон ва Қирғизистонда бир мартадан миллий чемпионатда бир мавсумда энг кўп тўп киритиўшга муваффақ бўлган. Ўзбекистон лигасида ўзини кўрсатган футболчи Артур Геворкян бўлади. Истеъдодли ҳужумкор футболчи 2014 йили “Насаф” сафида 18 та гол билан чемпионат тўпурарлари пойгасида ғолиб чиққан эди.
Бу рейтингда иккинчи ўрин Ўзбекистонга насиб қилди. Ҳамюртларимиз миллий чемпионатда 27 маротаба ва Қозоғистон юқори дивизионида олти марта, жами 33 бор энг яхши тўпурар совринини қўлга киритган.
Легионер сифатида Жаъфар Ирисметов “Алмати” сафида кетма-кет икки йил бир хил – 17 тадан гол билан чемпионат тўпурари бўлган.
Шунингдек, Улуғбек Бақоев “Тобол”да икки бор, “Жетису” ва “Иртиш” жамоалари ҳужумчиси сифатида бир мартадан тўпурарлар пойгасида барча рақибларини ортда қолдирган. Умуман олганда, Қозоғистон чемпионатларида ҳаммаси бўлиб, саккиз футболчигат 100 тадан кўп гол уриш насиб қилган. Улар орасида ягона легионер ҳисобланган Улуғбек Бақоев жами 111 та гол билан олти поғонада қайд этилди.
Марказий Осиё тўпурарлари рейтингида Тожикистон учинчи ўриндан жой олди. Тожик футболчилари ўз юртидаги мусобақада 30 марта тўпурарлик қилган.
Қирғизистон вакиллари ҳам фақат ўзларининг миллий лигасида 23 маротаюа тўпурарлик қилгани қайд этилган.
Бу рейтингда сўнгги поғонага Қозоғистон футболчилари жойлаштирилди. Улар ўз мамлакатлари миллий чемпионатида атиги 14 маротаба тўпурлар мусобақа ғолиби бўлган холос.
Марказий Осиё мамлакатлари чемпионатларида бир мавсумда энг кўп гол уриш бўйича рекорд – Ўзбекистон терма жамоасининг собиқ ҳужумчиси Жаъфар Ирисметовга тегишли. Моҳир ҳужумчимиз 2000 йилги мавсумда Тошкент вилоятининг “Дўстлик” жамоаси сафида рақиблар дарвозасини 45 маротаба ишғол қилиб, ҳозирча такрорланмай келаётган рекорд соҳибига айланди.
Қирғизистонлик Зокир Бердиқулов 1995 йили 42 та, туркманистонлик Сергей Казанков 1992 йили 41 та, туркманистонлик Режепмурат Агабаев 1995 йили 41 та гол билан мавсум тўпурар номига сазовор бўлган.