Ўзбекистон - Эрон: Рақамлар, фактлар, имкониятлар ёхуд бугун қасос олишимиз керак! (Катта превью)

Бугун Ўзбекистон терма жамоаси жаҳон чемпионати саралаши доирасида Эронга қарши майдонга тушади. Беллашув Тошкент вақти билан 18:00 да старт олади. Ўйинга "Бунёдкор" стадиони мезбонлик қилади. 

Ушбу баҳс олдидан SPORTS.uz сайти ижодкорлари сизга махсус ишланган катта превьюни тақдим этади. 

Демак, биз бошладик. Ўзбекистон ва Эрон миллий терма жамоалари шу вақтга қадар умумий ҳисобда 12 та қарама-қаршилик доирасида куч синашган. Вакилларимизда атиги битта ғалаба бор, яна бир ўйин дуранг натижа билан якун топган. Қолган 10 та учрашувнинг барчасида эронликларнинг қўли баланд келган. 

Кўриб турганингиздек, ушбу рақиб биз учун Осиёда ўта ноқулайлиги билан ажралиб туради. 

Мазкур жамоалар ўтказган ўзаро беллашувларда Сардор Азмун ва Али Даи 3 та гол билан тўпурар ҳисобланади. Қолаверса, Меҳди Тораби, Меҳди Тареми ва Саиджалол Ҳоссайни каби футболчилар 2 мартадан дарвозамизга йўл топа олишган.

Тўплар фарқи бўйича ҳам катта устунлик рақибларимиз томонида, афсуски - 3:16. Бизнинг 3 голимиздан биттаси автогол сифатида қайд этилган. Яна иккита голни Улуғбек Бақоев ва Элдор Шомуродов киритган.  

Ушбу беллашув олдидан вакилларимиз бош мураббийи Сречко Катанец матбуот анжуманида иштирок этди ва ўз фикрларини билдириб ўтди.

"Футбол 0:0 ҳисоби билан бошланади. Шу сабаб, имкониятларни тенг дейиш мумкин. Йигитларга мотивация шарт эмас. Улар олдиларида қандай рақиб турганини яхши англаб туришибди.

Туркманистонга қарши озроқ муаммолар бўлди, тан оламан. Бироқ бу бизга жиддий таъсир кўрсата олмайди. Эртага биз ажойиб муҳитда ва стадионда тўп тепамиз. Ўйлайманки, ҳаммаси биз учун ижобий якунланади", - деди вакилларимиз бош мураббийи.

Учрашув олдидан Эрон терма жамоаси бош мураббийи Амир Галенои бетоблиги сабаб матбуот анжуманида иштирок эта олмади. Унинг ўрнига ёрдамчи мураббий Антонио Маниконе ўз фикрлари билан ўртоқлашди. 

"Бош мураббий Амир Галенои бироз бетоб бўлиб қолдилар, шу сабаб бугун мен саволларингизга жавоб бераман. Ўйин ҳақида гапирадиган бўлсам, эртага қизиқарли учрашув бўлиши аниқ.

Ўзбекистон терма жамоаси билан июнь ойида тўқнаш келган эдик, эртага ҳам бизни жиддий учрашув кутиб турибди. Ўзбекистон Осиёда энг кучлилардан бири ҳисобланади. Словениялик мутахассис жуда тажрибали мураббий", - деди форслар ёрдамчи мураббийи.

Бугун қуйидаги кўринишда Эронга қарши майдонга тушишимиз кутилмоқда:

Дарвозабон: Ўткир Юсупов ("Навбаҳор").

Ҳимоячилар: Фарруҳ Сайфиев ("Пахтакор"), Абдуқодир Ҳусанов ("Ланс", Франция), Рустам Ашурматов ("Рубин", Россия), Ҳусниддин Алиқулов ("Ризеспор", Туркия), Ҳожиакбар Алижонов ("Пахтакор").

Ярим ҳимоячилар: Отабек Шукуров ("Фотиҳ Карагюмрюк", Туркия), Одил Ҳамробеков ("Пахтакор").

Ҳужумчилар: Жалолиддин Машарипов ("Пансеррайкос", Греция), Элдор Шомуродов ("Кальяри", Италия), Остон Ўрунов ("Навбаҳор"). 

Яна бир бор эслатиб ўтамиз, Ўзбекистон - Эрон беллашуви Тошкент вақти билан 18:00 да старт олади. Ўйинга "Бунёдкор" стадиони мезбонлик қилади. Чипталарни iTicket.uz платформаси орқали харид қилишингиз мумкин.

 

Фото: Ҳусан Сабитов, матн муаллифи: Шоҳрух Зоиров.