“Олтин тўп” соҳиби ҳам Ҳусановдек ўйнамаган!
- 26-феврал 2025, 09:29
- Zohir Toshxo’jayev
- 2
- Футбол
“Манчестер Сити” футболчилари ҳам, мухлислари ҳам февраль ойини тезроқ унутишни хоҳлайди. Чунки йилнинг энг қисқа ойида “шаҳарликлар” Премьер-лиганинг икки қудратли клуби – “Арсенал” (1:5) ва “Ливерпуль”дан (0:2) қақшатқич зарбага учради.
Европа Чемпионлар лигасининг плей-оффида “Реал” билан икки бор тўқнашиб, ҳар икки баҳсда 2:3, 1:3 ҳисобида мағлубиятга учради.
Буюк Британиядаги нуфузли манба – manchestereveningnews.co.uk портали эксперти Олли Жонс “шаҳарликлар”нинг февралдаги натижа ва кўрсаткичларини таҳлил қилар экан муваффақиятсизларга бурканган сўнгги ўйинларда “Манчестер Сити”даги ягона ёрқин воқеалик жамоада Абдуқодир Ҳусановнинг пайдо бўлиши билан боғлиқ эканини таъкидлади.
- “Манчестер Сити”нинг охирги пайтдаги нурсиз натижаларида фони ягона ижобий ҳолат Абдуқодир Ҳусановнинг жамоада порлай бошлагани бўлди. “Челси” билан ўйинда юз берган кўнгилсиз дебютдан кейин ўзбек футболчиси жанговар характерини намойиш қилиб, ўзини ўнглаб олди ва юқори савияли ўйин кўрсатмоқда.
“Манчестер Сити”да пайдо бўлиши Хосеп Гвардиола талабларига мослашиш ҳали ҳеч кимга осон бўлмаган. Ҳатто “Олтин тўп” соҳиби бўлган Родри ҳам жамоага янги келганида кўникиши учун бир мавсум керак бўлган.
Бироқ, “шаҳарликлар” жамоасида давом этаётган инқироз Ҳусановга бамайлихотир мослашиш фурсатини бергани йўқ.
“Ланс”дан 33,5 миллион фунт стерлинг эвазига олиб келинган Абдуқодир Манчестерга келиши билан кучли жамоалар ва Коул Палмер, Александр Исаак, Килиан Мбаппе, Винисиус Жуниор, Родриго, Муҳаммад Салоҳ каби юқори даражадаги футбол юлдузларига қарши жанг қилишига тўғри келди.
Бу ҳолат нафақат 20 ёшли ҳимоячи, балки жаҳон футболида юқори даражада ўйнаб юрган ҳар қандай футболчи учун ҳам катта синов эди. Айниқса, Ҳусановнинг “Сити”га келгунга қадар Европанинг энг кучли беш лигасидан бирида атиги 31 та учрашувда иштирок этганини инобатга олсак, у қандай босимни енгиб ўтишига тўғри келганини ҳис қилишимиз мумкин.
Дебютдаги хатодан кейин Хосеп Гвардиола жамоадаги жароҳатлар кўплигига қарамай, Ҳусановни ҳали ўйинларга қўйишга эрта экан, деган хулосага келиши, уни захира вариантига айлантиришга қарор қилиши ҳам мумкин эди. Бироқ испаниялик мутахассис бошқа йўлни танлади ва ўзбек футболчисини мавсумнинг энг қийин палласида дарров асосий таркиб ўйинчисига айлантирди.
Ёш ўзбек ҳимоячисининг мураббий билдирган ишончга жавоби янада ёрқин чиқди. У “Ньюкасл” 4:0 ҳисобида янчиб ташланган учрашувда юқори спорт формасида бўлган рақиб юлдузи Александер Исаакка ўйин бермади. Кейин Мадридда ўтказилган Европа Чемпионлар лигасининг амалдаги ғолиби “Реал”га қарши баҳсда жуда яхши ўйнади.
Премьер-лига пешқадами “Ливерпуль” билан тўқнашувда жамоадоши Жереми Доку билан бирга “Манчестер Сити”нинг энг яхши ўйинчиси бўлди. Бу баҳсда Ҳусанов бир неча кўрсаткичлар бўйича энг яхши натижа қайд этди, жамоасини хавфли вазиятларда қутқариб қолди, жамоадошларининг жонига оро кирди.
“Этихад”даги ҳаёт ва фаолият осон бошлангани йўқ. Лекин Ҳусанов мураккаб жараёнларда ўз характерини кўрсата олди. Хосеп Гвардиоланинг Абдуқодир борасида таваккалга қўл ургани қисқа муддатда ўзини тўлиқ оқлади, - деб ёзмоқда manchestereveningnews.co.uk портали эксперти Олли Жонс.
Абдуқодир Ҳусанов “Манчестер Сити”га келганидан бери Премьер-лига, Англия кубоги ва Европа Чемпионлар лигасида жами бешта учрашувда иштирок этиб, ўз ҳисобига битта гол ёздириб қўйди.
Гвардиола Ҳусановнинг асосий камчилигини айтди!
Шомуродовнинг фаолиятида катта ўзгариш!