Нодира терма жамоамизни мағлубиятдан қутқариб қолди

Венгриянинг Будапешт шаҳри мезбонлик қилаётган шахмат оламининг энг нуфузли мусобақаси ҳисобланган 45-Бутунжаҳон шахмат Олимпиадасида Ўзбекистон эркаклар ва хотин-қизлар терма жамоалари муваффақиятли иштирок этмоқда.

Бутун дунёдан 200 га яқин давлат терма жамоалар эркаклар ва хотин-қизлар ўртасидаги беллашувларда ғолиблик учун куч синашяпти. Олимпиада иштирокчиларининг умумий сони 630 нафар спортчини ташкил қилмоқда. Улардан 246 нафар гроссмейстерлардир.

Хотин-қизлар ўртасидаги мусобақанинг тўққизинчи турида ўзбекистонлик шахмат маликалари Сербия вакилларига қарши дона сурди.

Дастлабки икки тахтада ўйнаган Афруза Ҳамдамова ҳамда Нилуфар Ёқуббоева кучли рақибалари – Теодора Иньяк ва Марина Гайчин билан дуранг қайд этди. Маржона Маликова ҳарчанд қаршилик кўрсатмасин, Тияна Мандурага ютқазиб қўйди.

Бу баҳсда терма жамоамизни мағлубиятдан Нодира Нодиржонова қутқариб қолди. Тажрибали шахматчимиз тўртинчи тахтада Йована Эрич билан беллашди. Узоқ давом этган партияни Нодиржонова 96-юришдан кейин ўз фойдасига ҳал қилди.

Нодиранинг маҳорати умумий ҳисобда дурангни таъминлади – 2:2.

Эслатиб ўтамиз, мусобақа қоидасига кўра, ҳар бир терма жамоа беш нафар шахматчилан таркиб топади. Ҳар турда улардан тўрт нафари дона суради ва биттаси захира ўйинчиси вазифасини бажаради. Мусобақа швейцарча тизимда 11 раунддан иборат бўлади.  

Вақт назорати 40 та юриш учун 90 дақиқа, ўйин тугашигача 30 дақиқа қўшилади, ҳар бир юриш учун биринчисидан бошлаб +30 сония берилади.