"Насаф" ва "Пахтакор" ўртасидаги Суперкубокда доим бир хил ҳисоб қайд этилган. Бу гал-чи?

Бугун Жиззахда катта футбол байрами. "Сўғдиёна" стадиони Суперкубок баҳсини қабул қилади.

Мамлакатимизнинг кучли жамоалари "Пахтакор" ва "Насаф" ўзаро беллашади. "Шерлар" Суперлига чемпиони сифатида, "аждарлар" эса кубокни қўлга киритиб, мана шу учрашувга етиб келди. Ўйин 19:30да бошланади.

Тарихга назар соладиган бўлсак, Суперкубок 7 марта ўтказилган. "Пахтакор" 4 марта иштирок этган ва икки бор совринни қўлга киритган. "Насаф" уч марта қатнашиб, бир бор ғалабага эришган.

Қизиқ томони, бугунги жамоаларнинг ғалабалари айнан ўзаро ўйинларда қайд этилган. Яъни қаршиликлар 2016 йили "Бунёдкор" стадионида "Пахтакор"ни 1:0 ҳисобида таслим этган. "Пахтакор" 2021 йили "Динамо" ўйингоҳида, 2022 йили "Ўзбекистон" аренасида "Насаф"ни ҳудди шу ҳисобларда доғда қолдирган.

Қуйида "Насаф" ва "Пахтакор"нинг Ўзбекистон Суперкубогидаги ўзаро тўқнашувларида қайд этилган натижалар билан танишинг:

2016 йил. "Насаф" - "Пахтакор" 1:0. "Бунёдкор" стадиони (Тошкент)

2021 йил. "Пахтакор" - "Насаф" 1:0. "Динамо" стадиони (Самарқанд)

2022 йил. "Пахтакор" - "Насаф" 1:0. "Ўзбекистон" стадиони (Фарғона)

Сизнингча, бугун қандай ҳисоб қайд этилади? Комментларда ёзиб қолдиринг.