МЮнинг икки собиқ юлдузлари Англия клубининг эгаларига айланишди
- 9-май 2025, 16:16
- Ali Ahmadxo’jayev
- 0
- Футбол
Дэвид Бекхэм ва Гарри Невилл Англия футболининг тўртинчи дивизиони жамоаси бўлган "Салфорд Сити" клубини тўлиқ эгаллаб олишди. Уларнинг мақсади — клубни келажакда Премьер-лигага олиб чиқиш.
Бекхэм ва Невилл аллақачон "Салфорд Сити"нинг ҳаммуассислари бўлиб, улар билан бирга "Манчестер Юнайтед"даги собиқ жамоадошлари — Ники Батт, Раян Гиггс, Фил Невилл ва Пол Скоулс ҳам клубда улушга эга эди. Бу "92-йил авлоди" 2014 йилда клубни сотиб олган ва 5 йил ичида уни 4 марта юқори лигага олиб чиқишда ёрдам берган эди. Бироқ, шундан бери жамоа Иккинчи лигада қолиб кетди.
Эндиликда клубни юқори поғоналарга олиб чиқиш мақсадга айланган. Шу йўлда Бекхэм ва Невилл АҚШдаги Cонселло маслаҳат фирмасининг асосчиси Деклан Келли ҳамда Британия теннис ассоциацияси раиси Лорд Мервин Дейвис билан ҳамкорликда клубни тўлиқ сотиб олдилар. Бу орада Батт, Гиггс, Фил Невилл ва Скоулс ўз улушларидан воз кечишди.
The Athletic нашрига кўра, янги эгалик қилаётган гуруҳ ва бошқа кичик улуш эгалари клубнинг спорт ва инфратузилма ривожи учун 15–20 миллион доллар атрофида маблағ йиғишган.