Моуриньога хушхабар ёхуд Шомуродов зиёфатга бормайди!
- 16-декабр 2021, 07:09
- Zohir Toshxo’jayev
- 0
- Футбол
“Рома” раҳбарияти “Аталанта”га қарши учрашув олдидан клуб учун анъана ҳисобланган Рождество зиёфатини бекор қилди.
Gazzetta dello Sport нашрининг маълум қилишича, бу анъанадан воз кечилишига Моуриньо жамоаси қайд этаётган натижалар эмас, балки коронавируснинг янги тури – “омикрон” штамми тез тарқалаётгани сабаб бўлган.
“Рома” 2021 йилни яхши кайфиятда якунламоқчи ва шу боис, “Аталанта” билан бўладиган ўйинда ижобий натижа қайд этишга ҳаракат қилади. Ҳар бир футболчи сафда бўлиши учун уларнинг бошқалар билан мулоқотини чеклашга қарор қилинди.
“Бўрилар” янги йилгача “Аталанта” ва “Сампдория” билан куч синашиши лозим.
Моуриньога хушхабар
“Рома”нинг энг истеъдодли футболчиси Николо Дзаньоло жароҳатидан қутилиб, умумий гуруҳ машғулотларига қўшилди. Айни пайтда етакчи ўйинчилардан бир нечтаси жароҳатлангани боис Жозе Моуриньо олдиндаги муҳим учрашувлар учун таркибни шакллаштиришда муаммога дуч келмоқда.
22 ёшли ҳужумкор футболчи Конференциялар лигаси доирасида ЦСКАга қарши ўтказилган учрашувда захирадан ўйинга тушиб, бир неча дақиқадан кейин шикастланган ва майдонни эрта тарк этганди.
Sky Sport Italia нашрининг хабар беришича, клуб тиббиёт штаби Дзаньолога тўлиқ куч билан машғулотларда қатнашиш учун рухсат берган.
Дзаньоло жорий мавсумда жами 20 та учрашувда қатнашиб, бир жуфт гол урди ва жамоадошларига учта голли пас узатди.
“Аталанта”нинг нозик жойини топамиз!
“Рома” ҳимоячиси Матиас Вина “Аталанта”га қарши бўладиган беллашувда ижобий натижа қайд этилишини кутмоқда.
- Ҳозир мавсумнинг энг муҳим палласи. Бергамодаги ўйинга жиддий тайёргарлик кўриш керак. Биз доим ғалаба учун ўйнаймиз. Ҳар бир баҳсга максимал даражада тайёрланамиз.
“Аталанта”нинг нозик жойини топишимиз керак. Бу жиддий рақиб, лекин ҳар қандай жамоанинг заиф нуқтаси бўлади.
Ўзимни яхши ҳис қиляпман. Бунақа тиғиз график барибир таъсир қилади, чарчоқ аломатлари ҳам сезиляпти. Шунга қарамай, ҳолатимиз анча яхши, - деди 24 ёшли ҳимоячи.
“Рома” футболчиси икки жамоадан бирини танлаши керак
Рим клуби бош мураббийи Жозе Моуриньо олдиндаги трансферлар жараёнида бир қатор ўзгаришлар бўлишини анчадан бери айтиб келади.
Португалиялик мутахассис унинг режаларига кирмаган ўйинчиларни бошқа жамоага ўтишини ва уларнинг ўрнига “Рома”ни ҳақиқатан кучайтира оладиган ижрочилар келишини истаяпти. Моуриньонинг трансфер сиёсатини клуб раҳбарияти ҳам тўлиқ қўллаб-қувватлаяпти.
“Рома”ни тарк этиши керак бўлганлардан бири ярим ҳимоячи Амаду Диавардир. Гвинеялик футболчи январда ўзига янги жамоа топиши керак.
24 ёшли ўйинчига ҳозирча иккита жамоа эътибор қаратган. “Рома”нинг асосий таркибига кира олмаётган футболчи Франция чемпионати вакили “Марсель” ёки Германия Бундеслигасида иштирок этаётган “Айнтрахт”ни танлаши мумкин.
Диавара жорий мавсумда А Серияда тўрт маротаба майдонга тушиб, ўзини кўрсата олгани йўқ.
