Айни кунларда Фижининг Сува шаҳрида оғир атлетика бўйича ёшлар ўртасида жаҳон чемпионати бўлиб ўтмоқда. Ушбу мусобақа доирасида иштирок этган ҳамюртмиз Адҳамжон Эргашев -67 килограмм вазн тоифасида 3 та олтин (даст ва силтаб кўтариш, икки кураш) медални қўлга киритгани ҳақида хабар берган эдик. Бугун Миллий олимпия қўмитаси ушбу спортчимиз учун махсус табрик йўллади.
"Ўзбекистон Миллий олимпия қўмитаси Сизни ажойиб ғалаба – оғир атлетика бўйича ёшлар ўртасида жаҳон чемпиони шарафли унвонини муваффақиятли ҳимоя қила олганингиз билан самимий ва қизғин қутлайди. Сиз кетма-кет иккинчи бор жаҳон биринчилигида ўз вазнингиз бўйича дунёда тенги йўқ энг кучли полвон эканлигингизни ёрқин ва ишонарли намойиш этдингиз. Шу билан бирга 2020 йилда Токиода бўлиб ўтадиган Олимпия ўйинларида қатнашиш учун қимматли рейтинг очколарига эга бўлдингиз.
Фижида бўлиб ўтаётган жаҳон чемпионатидаги бу улкан ғалабангиз Президентимиз Шавкат Мирзиёв алоҳида таъкидлаганидек, ёшларимизда ватанпарварлик туйғуларини шакллантиришга, мамлакатни дунёга танитишга, барча юртдошларимизга ғурур ва ифтихор бағишлашига хизмат қилиши шубҳасиздир. Фурсатдан фойдаланиб, Сиз каби полвон йигитларни тарбиялаётган ота-онангизга, устозларингизга ва албатта Ўзбекистон оғир атлетика федерациясига миннатдорчилик изҳор этамиз", – дейилади ушбу табрикда.
Эслатиб ўтамиз, Адҳамжон Эргашев ўтган йили Тошкент мезбонлик қилган ёшлар ўртасидаги дунё биринчилигида -61 кг вазн тоифасида иштирок этиб, унда ҳам барча йўналишлардаги олтин медалларни қўлга киритган эди. Бу гал унинг қайд этган натижаси даст кўтаришда 141 кг, силтаб кўтаришда 173 кг ва икки кураш бўйича 314 кгни ташкил этди. Таъкидлаш жоиз, бу натижалар унинг шахсий рекорди эмас. Ҳамюртимиз ёшлар ўртасидаги жаҳон рекорди соҳиби ҳам ҳисобланиб, унинг натижалари йўналишларига қараб 142 кг, 174 кг 316 кгга тенг.
Ўз навбатида, SPORTS.uz сайти ҳам полвонимизнинг яна бир муваффақияти билан қутлаб, келажакдаги фаолиятида улкан зафарлар тилаб қолади.