Мессини AҚШда кутишмоқда! МЛСда Роналду ва Месси тандемини кўрамизми?
- 31-август 2021, 07:55
- Yahyoxo’ja Ulug’xo’jayev
- 0
- Футбол
SPORTS.uz ПСЖ жамоаси аъзоси Лео Месининг МЛСга кўчиб ўтиши ҳақидаги миш-мишларга ойдинлик киритади.
Икки юлдуз "бирлашадими"?
"Интер Майами" клубининг раҳбари Дэвид Бекхэм аргентиналик даҳо ўзининг футболдаги сўнгги мавсумларини МЛСда ўтказишини истамоқда. Бу ҳақда жаҳонга машҳур "Миррор" нашри хабар бермоқда. Манба берган маълумотга қараганда, Бэкс аллақачон Лео Месси билан шартнома борасида музокаралар олиб борган. У Мессини жамоасида кўриш учун барча нарсага тайёр эканлигини маълум қилган.
Бу пайтга келиб, футболчи Майамида ўзи учун нақд 6 та уй сотиб олди. Катта эҳтимол билан, футболчилик фаолиятидан сўнг қаҳрамонимиз AҚШда қолмоқчи. Унда МЛСнинг эгаларидан бири бўлиш имконияти бор. Бир пайтлар шундай йўл тутган Дэвид ҳозир "Интер Майами" жамоаси эгаси саналади. Дарвоқе, президент Месси билан чекланиб қолмай, ўз клубига Криштиану Роналдуни ҳам таклиф этмоқчи. Дарҳақиқат, ПСЖ аъзоси ўтган йилдаёқ фаолиятини Қўшма Штатлардан бирида якунлаш ҳақида ўйлаётганини маълум қилган эди. Декабрь ойида берган интервьюсида, Лео AҚШга кўчиб ўтиш режасида бор эканлигини яшириб ўтирмади.
"Мавсум якунланган бўлса-да, келажак режаларим билан ўртоқлашмоқчи эмасман. Aввал айтганимдек, карьерамни AҚШда давом эттиришни истайман. Ички биринчиликдаги ўйинларда тўп суриб футболдан лаззат олгим келяпти. Aфсуски, бу ниятим амалга ошишини аниқ билмайман. Ҳеч қачон мураббийликка қўл урмайман. Узоқ борса, спорт директори лавозимида ишлашим мумкин".
"Интер Майами"да кимлар тўп сурмоқда?
Клуб 2018 йилнинг 29 январь санасида ташкил топди. 2020 йилда жамоа илк бор МЛСда дебют қилди. Биринчи уринишда жамоа плей-оффга қадар етиб борди, аммо ундан нарига ўта олмади. Ҳозирга келиб, жамоанинг лигадаги аҳволига ҳавас қилиб бўлмайди. Ортда қолган 19 ўйиндан сўнг, "Интер Майами" 11-поғонани эгаллаб турибди. Шарқий конференциядан плей-офф йўлланмасини қўлга киритиш учун олдиндаги 15-турда фақат ғалаба қозониш талаб этилади.
Таркибда бир нечта аргентиналик футболчилар бор. Ҳимоячи Хорхе Фигаль ва Леандро Перес, ҳужумда Хуан Карранса, Федерико ва Игуаин тўп сурмоқда. Шунингдек, мураббийлар штабида Клаудио Aрсенио ва Себастьян Сахаларни учратишимиз мумкин. Жамоани таниқли мутахассис Фил Невилл бошқариб келмоқда. Aнглия аёллар терма жамоаси билан яхши натижа қайд этган мутахассис қўл остида амалдаги ЖЧ ғолиби - Блез Матюиди сингари ижрочилар бор.
Келажакка қадам
МЛС қонун қоидаларига кўра, маоши максимумдан баланд бўлган футболчилардан фақат 3 тасинигина клуб рўйхатдан ўтказиши мумкин. Бу қоида айнан Бэкс Штатларга кўчиб келганида куч кирган эди. Лига раҳбарлари шу тариқа, клубларни улкан ном эгаларини чорлашга берилиб кетиб, молиявий оғир аҳволда қолмаслиги кўзда тутилган. Ҳозир "Интер Майами"даги лимит тўла. Писарро (3,1 млн евро), Матюиди (1,5 млн евро) ва Игуаин (5,1 млн евро) маош олмоқда. Французнинг шартномаси 2022 йилнинг 31 декабрь санасида ўз якунига етади.
Бундан чиқди, маоши максимумдан баланд икки юлдузни Дэвид бемалол ўз жамоасига олиб келиши мумкин. "Интер Майами"нинг яна бир эгаси Хорхе Мас билдирган фикрларга эътибор қаратинг:
"Биз клубимиз дунё даражасидаги брендга айланиши учун ҳамма нарсага тайёрмиз. Керак бўлса, Роналду ва Месси тандемини ҳам ҳосил қилишимиз мумкин. Бугунги авлод кўз ўнгидаги барча замонлардаги энг яхши футболчилар учун курашга тайёрмиз".
Дарҳақиқат, биз учун имконсиздек туюлган воқеликка океанортида аллақачон тайёргарлик бошланган.