Месси "Барса"га қайтадими, "Реал" иккита супер трансфер амалга оширишга яқин, Зидан ишга қайтиши мумкин ёхуд ҳафта дайжести!

Месси "Барселона"га қайтадими? 

Лионель Мессининг жамоадан кетиши ҳақида ҳар хил хабарлар тарқалмоқда ва ПСЖнинг Чемпионлар лигасидаги муваффақиятсизлигидан кейин улар янада кучайиши табиий.

Баъзи инсайдерларнинг таъкидлашича, аргентиналик юлдуз келаси ёзда клубини ўзгартиришни режалаштирмаяпти. Бироқ бошқа маълумотлар ҳам пайдо бўлди. Месси гўёки яна "Барселона" либосини кийиб кўришни истайди. Гап шундаки, футболчининг ўзи ва унинг оиласи ҳозир Париждагидан анча қулайроқ бўлган Барселона шаҳрига қайтмоқчи. Шу боисдан ҳам Лео "Камп Ноу"га қайтишни ўйламоқда. Миш-мишларга кўра, ҳаммаси Каталония клубининг тўлов қобилиятига боғлиқ.

"Реал" иккита фантастик трансферни амалга оширмоқчи

Ёзда "Реал" клубида қайта қуриш бўлади. Хабарларга кўра, Мадрид гранди фантастик трансферларни тайёрламоқда. "Қироллик клуби" ярим ҳимоячи Жуд Беллингем ва ҳужумчи Эрлинг Холандни "Сантьяго Бернабеу"га олиб келмоқчи. Беллингемнинг отаси "қаймоқранглилар" вакили билан учрашгани ҳақида хабарлар берилганди ва 19 ёшли англиялик билан шартнома бўйича келишиб олгани борасида маълумотлар бор. 

Эрлинг Холанд билан бўлган вазиятда келишиш янада қийинроқ бўлиши мумкин. "Манчестер Сити" норвегиялик футболчини ўтган ёзда сотиб олганди. Бироқ, "шаҳарликлар" устози Хосеп Гвардиола ва Холанд ўртасида сўнгги учрашувларда келишмоқчилик келиб чиққан. "Реал" Эрлинг билан келишувга эришиб, уни Карим Бенземанинг ўрнини эгаллашига умид қилмоқда.

Зидан клуб борасида бир қарорга келди

Зинедин Зидан икки йиллик танаффусдан сўнг яқин келажакда мураббийликка қайтиши мумкин. Франциялик мутахассис ПСЖни бошқариши кутилмоқда. Катта эҳтимол билан Лига 1 гранди мавсум охирида Кристоф Галтье билан хайрлашади.

Галтье қўл остидаги охирги натижалар, айниқса, Европа чемпионлар лигасидаги "Бавария"га қарши мағлубият Париж раҳбариятнинг жаҳлини чиқарган. ПСЖ расмийлари Зиданни ЕЧЛда "Реал" билан амалга оширган натижаларини жуда яхши билади ва парижликлар айнан Европанинг энг кучли мусобақасида ғалаба қозонишни ўз олдига мақсад қилган. 50 ёшли фрациялик мураббий ҳам бу лавозимга қизиқиш билдирмоқда. 

Ойбек Йўлдошев тайёрлади.