Машҳур юлдуз Ҳусановнинг “Манчестер Сити”га ўтганини қандай баҳолади?
- 22-январ 2025, 23:59
- Zohir Toshxo’jayev
- 3
- Футбол
Абдуқодир Ҳусановнинг “Манчестер Сити”га кўчиб ўтгани ҳамон кенг муҳокама қилинмоқда, турли ахборот манбалари футбол оламидаги таниқли шахсларнинг ўзбек футболчи трансфери ҳақидаги фикр-мулоҳазаларини эълон қиляпти.
Хусусан, Украина нашрлари бу мамлакат футболида чуқур из қолдирган ўзбекистонлик ҳужумчи Максим Шацкихнинг Абдуқодир Ҳусанов трансфери бўйича муносабатини эълон қилди.
Маълумки, Максим Киевнинг “Динамо” клуби сафида самарали фаолият юритган, Украина чемпионатида энг кўп гол урган тўпурар ҳисобланади. Ҳамюртимиз бу жамоа сафида Европа Чемпионлар лигасигада голлари орқали ўзини кўрсата олган.
Sports.uz портали Максим Шацкихнинг украиналик журналистлар берган саволларга жавобини ўзбекистонлик футбол ишқибозлари эътиборига ҳавола этади.
— Максим Александрович, ўзбек ҳимоячиси Абдуқодир Ҳусановнинг “Манчестер Сити”га трансферини қандай баҳолайсиз?
— Биринчидан, Англияга футболчиларни шунчаки олишмайди, айниқса, юқори даражадаги топ-клубларга.
Иккинчидан, “Манчестер Сити” янги ўйинчиларни жамоа таркибидаги футболчилар сонини кўпайтириш учунгина сотиб олмайди. Ҳусановга фақатгина “Манчестер Сити” даъвогарлик қилгани йўқ.
Бу футболчини олиш учун катта навбат вужудга келди. Европанинг деярли барча топ-клублари даъвогарлик қилди.
Энди буёғига ҳаммаси Ҳусановнинг қўлида, ҳаммаси унинг ўзига боғлиқ.
Абдуқодир ҳақиқатан “Манчестер Сити” трансферига лойиқ ўйинчи. У ўзининг меҳнаткашлиги, ўйини, борини бериб ўйнаши, иштиёқи ва бошқа хусуситларини намойиш қилиш орқали бунга эришди. “Манчестер Сити”даги фаолияти муваффақиятли чиқади, деб ўйлайман.
Фақат Ҳусановга дарров асосий таркибдан жой беришадими ёки йўқ, мана шунисини билмайман. Яқин орада буни ҳам билиб оламиз.
— “Манчестер Сити” кейинги пайтдаги натижаларини инобатга олиб, балки Хосеп Гвардиола Абдуқодир Ҳусановни дарров асосий таркибга киритар...
— Бўлиши мумкин. “Манчестер Сити” ҳозир қайд этаётган кўрсаткичлари билан мақтана олмаслигини инобатга олиб, балки Ҳусановнинг имкониятларидан тўлиқ фойдаланишга уриниб кўрар. Қани кутамиз!
Таъкидлаш жоизки, Абдуқодир Ҳусанов бугунги кунда “Манчестер Сити”даги машғулотларини бошлаб юборган. Бош мураббий Хосеп Гвардиола ўзбек футболчисининг жисмоний имкониятларини юқори баҳоламоқда.
Барибир ҳар қандай бош мураббий ҳам қиммат нархга олинган янги ўйинчига ўзини кўрсатиш учун имкон бериши табиий. Абдуқодир Ҳусанов ана шу имкониятлардан унумли фойдаланиб, “Ланс”да бўлгани каби асосий таркибдан муқим ўрин олишни уддалашига умид қиламиз.