“Машъал” клуби селекция ишларида фаолликни бошлаб юборган. Аниқроғи, футболчиларини Суперлига клубларига ва хорижга трансфер қилиш юзасидан қизғин музокаралар кетмоқда. Бу ҳақида яқинда “Машъал” клуби бош директори Илҳом Қурбонов sports.uz сайтига маълум қилганди.
Хабарингиз бор, “Машъал” ўз ҳужумчиси Шерзод Темировни “Пахтакор”га сотди. Ҳозирда ҳам муборакликларнинг қатор ўйинчиларига харидорлар чиқмоқда.
Sports.uz сайти маълумотига кўра, жамоанинг 20 ёшли ярим ҳимоячиси Сардор Абдураимовга қизиқиш жиддий. Айниқса, Қатар юлдузлар лигасида иштирок этаётган клуб “Машъал” футболчисини ўз сафида кўриш истагида ва бу борада иккала томон музокаралар жараёнида. Фақат унга қайси жамоа қизиқаётгани сир тутилмоқда.
Бу ҳали ҳаммаси эмас. Сардорга Осиёнинг яна бир мамлакатидан аниқ таклиф келиб тушган. Бундан ташқари, Суперлигамиздан ҳам етарли даражада чорловлар борлиги маълум. Ушбу мавсумда Абдураимов 20 та учрашувда 3 та гол урди ва 4 та голга ассистентлик вазифасини бажарди.
Маълумки, иқтидорли футболчи биринчи даврани “Бунёдкор”да ўтказганди, бироқ у ерда Вадим Абрамов бош мураббийлигида етарли даражада ўйин амалиётига эга бўлмади, асосан захирада қолиб кетганди. “Машъал”га қайтганидан кейин Сардор Абдураимов яна ўзининг нималарга қодирлигини кўрсата бошлади. Оқибатда унинг ўйини Осиё клубларини ҳам ўзига жалб этяпти.
“Машъал” футболчиси янги мавсумни ўзимизнинг чемпионатда ўтказадими ёки легионерга айланадими, буни тез орада билиб оламиз.
Шунингдек, “Машъал”нинг нигериялик ярим ҳимоячиси Ифеаньи Ифеаньига ҳам ўзимизнинг ва Осиё клубларидан таклифлар бўляпти. У жорий чемпионатда 21 та ўйинда майдонга тушди ва икки марта ассистентлик қилди.