“Манчестер Юнайтед” рақиб юлдузини ўзига оғдириб олмоқчи

“Манчестер Юнайтед” раҳбарияти жамоа ҳужумкорлигини ошириш мақсадида “Челси” вингери Ҳаким Зиешни трансфер қилишни режалаштирмоқда, деб хабар тарқатди GiveMeSport сайти.

Марокашлик футболчи Лондон клубини тарк этишга яқин турибди. Анчадан бери уни “Милан”га ўтиши ҳақида хабарлар тарқатилаётган эди. Бироқ Италия чемпиони томонидан аниқ таклифлар бўлгани йўқ.

Бу вазиятдан манчестерликлар фойдаланиб қолмоқчи. Жамоанинг янги бош мураббийи Эрик тен Хаг Ҳаким Зиеш билан шахсан таниш ва имкониятларини жуда яхши билади. Шу боис, клуб хўжайинларидан марокашлик ҳужумкор футболчини олиб келишни сўраган.

Ҳаким Зиеш ҳарчанд ҳаракат қилмасин Томас Тухель жамоасида асосий таркибнинг муқим ўйинчисига айлана олмади ва жамоасини янгилашга қарши эмас.