"Манчестер Сити" "Реал Мадрид" ҳужумчисини кўзлаб қўйди. Бунга футболчининг фикри қандай?

Англиянинг "Манчестер Сити" клуби "Реал Мадрид" ҳужумчиси ҳисобланган Родригога жуда катта қизиқиш билдирмоқда. Бу ҳақида "Relevo" нашри хабар бермоқда. 
 
Манбага кўра, манчестерликлар ёзги трансферлар ойнасида футболчи учун курашган. Бироқ, бразилиялик ҳужумчи "қироллик клуби"да қолишни афзал кўриб, англияликларнинг таклифини рад этган. 
 
Мазкур таклифга футболчининг фикри қандай бўлди? 
 
"Очиғини айтсам, бу ҳақида кўп маълумотим йўқ. Бу отамнинг ва агентимнинг вазифасидир. Ҳаттоки, таклифлар бўлганми ёки йўқ бу ҳақида ҳам хабарим йўқ. Шуни ҳам таъкидлашим керак, мен бу ерда бахтлиман" - деди "қаймоқранглилар" ҳужумчиси. 
 
Маълумот ўрнида, 24 ёшли форвард жорий мавсум мадридликлар сафида 31 та учрашувда иштирок этиб, 12 та гол ва 8 та голли узатмага муаллифлик қилган. Унинг клуб билан шартномаси 2028 йилгача мўлжалланган бўлиб, Тransfermarkt порталидаги нархи 100 миллион евро деб баҳоланмоқда.