"Манчестер Сити" ҳимоячиси билан шартномани узайтиради

"Манчестер Сити" португалиялик ҳимоячи Рубен Диаш билан шартномани узайтириш бўйича келишувга эришди, деб ёзади журналист Давид Орнштейн Х ижтимоий тармоғида.

Орнштейннинг ёзишича, "Манчестер Сити" Диаш билан янги шартнома имзолаш борасида принципиал келишувга эришган. 28 ёшли марказий ҳимоячининг амалдаги шартномаси 2027 йилнинг июнида ўз ниҳоясига этади. Янги келишув узоқ муддатли бўлади.

Португалиялик футболчи "шаҳарликлар" сафида 2020 йилнинг сентябридан буён тўп суриб келмоқда. У ўтган мавсумда бир нечта ўйинларда "Манчестер Сити" сардори сифатида майдонга тушди.

Умумий олганда, Диаш 2024/2025 йилги мавсумда "Манчестер Сити" сафида барча мусобақаларда 44 та ўйинда майдонга тушиб, самарали ҳаракат қилмаган.