Луис Энрике қимматбаҳо тўпурарга қўшиб, тўртта юлдузни асосий жамоадан четлатди
- 24-июл 2025, 16:22
- Zohir Toshxo’jayev
- 0
- Футбол
Франция чемпионати ва УЕФА Чемпионлар лигаси ғолиби “Пари Сен-Жермен” мураббийи Луис Энрике қимматбаҳо ҳужумчи Рандаль Коло Муанини асосий жамоадан четлатиб, захира таркиб билан машғулот ўташга юборди.
ПСЖ Коло Муанини 2023 йили катта мақсадлар билан “Айнтрахт”дан 95 миллион еврога трансфер қилган эди. Бироқ Париж клубини Луис Энрике бошқара бошлагач, бу форварднинг ишлари юришмай қолди.
Асосий таркибдаги жойини йўқотган Рандаль ўтган мавсумнинг иккинчи ярмида ижара асосида “Ювентус”да ўйнаб, 22 та учрашувда ўнта гол урди ва учта голли пас узатди.
Лекин бу натижалар Луис Энрике эътиборини тортмади.
Le Parisien нашрининг маълум қилишича, испаниялик бош мураббий захира таркиби машғулотларига ижарадан қайтган Карлос Солер, Марко Асенсио, Милан Шкриньяр ва Норди Мукиэле каби ўйинчиларни ҳам жўнатиб юборган. Бу футболчиларнинг бирортаси Луис Энрикега керак эмас ва тезроқ ўзларига янги жамоа топиши талаб этилади.