“Ланс” бу нархга Ҳусановни бермайдиган бўлди!
- 28-ноябр 2024, 11:00
- Zohir Toshxo’jayev
- 5
- Футбол
Қишки трансферлар даври яқинлашгани сари Абдуқодир Ҳусановнинг бошқа клубларга кўчиб ўтиши мумкинлиги ҳақидаги хабарлар ҳам тобора кўпайиб бормоқда.
Европа матбуоти ўзбек футболчиси фаолиятини қайси клублардан давом эттириши мумкинлиги, 20 ёшли ҳимоячининг трансфер суммаси қанча бўлиши, “Ланс”нинг ўз кашфиёти бўйича режалари ҳақида турли маълумотларни чиқармоқда.
Sports.uz портали ўзбекистонлик футбол ишқибозлари эътборига Европадаги манбаларнинг Абдуқодир Ҳусанов ҳақидаги ахборотларини ҳавола қилишда давом этади.
2024-2025 йилги мавсумнинг қишки трансферлар ойнаси яқинлашиб келмоқда. Бир неча манбалар “Ланс”нинг ўзбекистонлик марказий ҳимоячиси Абдуқодир Ҳусанов учун курашда “Пари Сен-Жермен” клубини фаворит сифатида эътироф этяпти.
Парижликлар спорт директори Луиш Кампуш 20 ёшли легионер ҳақида трансфер маълумотномасини тайёрлаяпти. Шундан кейин иш расмий таклифга кўчиши керак.
Ҳозирнинг ўзида Ҳусанов тахминан 20 миллион еврога баҳоланяпти. Биздаги маълумотларга қараганда, ПСЖ январда бу трансферни амалга ошириш имкониятидан фойдаланиб қолмоқчи.
Лансликлар ёзда Нил Ал-Айнауи ва Кевин Дансонинг барбод бўлган трансферлари зарарини қоплаш учун 40 миллион евро атрофида пул топиши лозим. Шу боис, ПСЖ 20 миллион еврога баҳоланаётган Ҳусановни ўз таркибига қўшиб олиши учун “Ланс”га таклиф қилинадиган суммани кўтариши талаб этилади.
Имконсиз ишнинг ўзи йўқ. Қолаверса, Ҳусанов ўйин даражаси кескин ўсиб бораётган ва катта салоҳиятга эга ўйинчи ҳисрбланади. У жамоадан кетиш илинжида юрган 29 ёшли Милан Шкриньярнинг ўрнини бемалол боса олади. Бу ёғига иш қандай кечишини кузатиш ва янгилик кутиш лозим.
ПСЖ мутасаддилари “Ланс”нинг иқтидорли ўйинчиси Абдуқодир Ҳусановни олиш йўлларини қидиряпти. Бу трансфер январга мўлжалланган.
“Пари Сен-Жермен” қишки трансферлар ойнаси даврида таркибдаги айрим нозик нуқталарни янги ўйинчилар билан тўлдириш имкониятидан фойдаланиб қолишни режа қилган. Нишондаги футболчилар орасида Абдуқодир Ҳусановнинг номзоди кўпчиликнинг эътиборини тортмоқда.
20 ёшли ўзбекистонлик марказий ҳимоячи парижликлар спорт директори Луиш Кампушнинг трансфер режаларида муҳим фигурага ҳисобланади.
ПСЖ кейинги пайтда таркибни сезиларли даражада ёшартиришга урғу қаратмоқда. Қолаверса, парижликлар ўз сафига қўшиб оладиган иқтидорли ёш ўйинчиларни Лига 1 жамоаларидан топишга алоҳида эътибор беряпти.
Абдуқодирнинг “Ланс” билан ҳамкорлик шартномаси 2027 йилнинг ёзигача давом этиши белгиланган. Унинг шиддатли ўйин услуби ва футболни тушуниш даражаси Европанинг бир неча клублари эътиборини жалб қилди.
“Ланс” молиявий қийинчиликларни бошдан кечираётган бўлса-да, Ҳусановни қишки трансферлар даврида қўйиб юбормаслиги мумкин. Чунки бу кетишда мавсум охиригача футболчининг нархи янада кўтарилади.
Ҳусановнинг тақдири ПСЖ ва “Ланс” ўртасидаги музокараларнинг қандай кечишига боғлиқ бўлади. Агар пойтахтликлар лансликларни трансферга кўндира олса, Абдуқодирнинг фаолиятида янги саҳифа очилади...
Эслатиб ўтамиз, Абдуқодир Ҳусанов футбол сир-асрорларини “Бунёдкор” академияси ўрганган. Профессионал футболчилик фаолиятини Беларуснинг “Энергетик-БГУ” клубида бошлаган. 2023 йилнинг ёзида “Ланс” ҳимоячини 100 минг евро эвазига ўз таркибига қўшиб олди.
Европа суперклуби Ўзбекистон терма жамоаси ўйинчиси трансфери бўйича иш бошлади. Янгилик бўладими?
Катта пул керак: Ҳусанов “Ланс”ни қутқарадими?