"Кучимиз етмай қолди, демаган бўлардим, бу саволнинг жавобини мавсум охирида топамиз" - "Нефтчи" футболчиси

Биласиз, “Нефтчи” клуби жорий чемпионатни мағлубиятсиз давом эттириб келмоқда ва “Бунёдкор” билан мусобақа жадвалида қўшҳокимликни ўрната олган.

Фарғоналиклар охирги турда ўз майдонида “Турон”ни қабул қилиб, 1:1 ҳисобида дуранг натижа қайд этдилар. Агар ушбу учрашувни ғалаба билан тамомлаганларида ҳозир мутлақ пешқадамга айланиб олган бўларди. Бироқ ўша баҳснинг охирги дақиқаларида “Нефтчи” ўз дарвозасидан гол ўтказиб ғалабани қўлдан чиқарди.

Жамоанинг истеъдодли футболчиларидан бири Аббос Ғуломов аста-секин “Нефтчи”нинг етакчи фигураларидан бирига айланиб боряпти. Куни кеча Sports.uz журналисти ушбу ижрочи билан суҳбатда бўлди.

- "Нефтчи" "Турон"га қарши беллашувда сўнгги дақиқада гол ўтказиб ғалабани қўлдан чиқарди. Охирида жамоанинг кучи етмай қолдими?

- Ғалабани қўлдан чиқарганимиз аламли, албатта. Лекин кучимиз етмай қолди, демаган бўлардим. Шунчаки, қаердадир омадимиз келмади. Охирида мувозанатни йўқотиб қўйдик, деб ўйлайман.

- Ғалаба қўлдан чиқарилгани жамоа кайфиятига қанчалик таъсир қилди?

- Ҳамма ўзи учун керакли хулосаларни чиқарди ва кейинги учрашувларда йўқотилган очконинг ўрнини қоплашга ҳаракат қиламиз.

- Олдинда "Нефтчи"ни сафарда "Бухоро"га қарши учрашув кутмоқда. Рақибни ўргандингларми? Кучсиз ва кучли тарафлари нимада деб ўйлайсиз?

- Мураббийлар ўрганиб, кўрсатмалар беришади. Биз шу кўрсатмаларни бажариб, рақибнинг кучли томонларини ёпиб, кучсиз тарафидан фойдаланишга ҳаракат қиламиз.

- “Бухоро”га қарши учрашувдан нима кутяпсиз?

- Қизиқарли ўйинни ва албатта ғалабани.

- "Нефтчи" чемпионатни мағлубиятсиз давом эттиряпти. Бундай пайтда ютқазмаслик ва мағлубиятсиз серияни давом эттириш учун дуранг ҳам жамоа учун яхши натижага айланадими?

- Мағлубиятсиз серияни ғалаба билан давом эттиришни хоҳлаймиз. Аммо доим ҳам биз ўйлагандек бўлавермайди.

- Виталий Левченко сиз кўрган мураббийлар орасида энг яхшисими?

- Энг яхшиларидан бири деган бўлардим.

- Футболчига рақамни қанчалик аҳамияти бор ва сиз айнан тўп сураётган 70- рақамни танлашингизга сабаб нима?

- Бирор-бир аҳамияти бор деб ўйламайман. 70 ни танлашимга аниқ бир сабаб йўқ. Шу рақам бўш бўлганлиги учун танлаганман ва мен учун қадрли бўлиб қолган.

- Мавсум сўнггида кучли учликда қайси жамоаларни кўряпсиз?

- Бу саволнинг жавобини мавсум охирида топамиз (кулади).

Шуҳратбек Жўраев.