"Кўп нарса мен учун янгилик бўлди" - клуби билан 3 та соврин ютган легионеримизга талабгорлар бор

Бангладеш чемпионатида тўп сураётган легионерларимиз учун мавсум тугади ва уларга таътилга чиқишди.

Бу мавсумда “Башухандра Кингс” жамоаси мамлакат чемпиони бўлди ва бошқа Кубокларни ҳам қўлга киритди. Ушбу клуб сафида ҳамюртларимиз тўп суришганини эслатиб ўтиш лозим.

Асрор Ғофуров ва Бобур Йўлдошев “Башухандра Кингс”нинг совринлар қўлга киритишида катта ҳисса қўша олдилар ва улар ўзларига билдирилган ишончни оқладилар.

Sports.uz журналисти Бобур Йўлдошевга бир қатор саволлар билан мурожаат қилди.

- Бангладешда футбол мавсуми якунига етди ва чемпионлик ҳам қўлга киритилди. Қандай таассуротлар қолди?

- Таассуротлар одам кўплиги билан эсимда қолди. Футболи энди ривожланаётган давлат. Тўғрисини айтганда, биринчи марта легионер бўлиб ўйнадим. Барибир кўп нарсалар мен учун янгилик бўлди. Бошқа давлат, бошқа тил, бошқача муҳит.

- Биламизки, сизни жамоангиз Бангладешда энг яхшиси. Чемпионлик қандай қўлга киритилди? Бу осонроқми? Яъни, рақобатда ҳеч ким бас кела олмаяптими?

- Ҳа тўғри, энг яхшиси. Албатта, чемпионликни қўлга киритиш қийин бўлмади. Нега деганда, ҳамма яхши футболчилар йиғилган жамоа эди. Шунинг учун катта қийинчиликлар бўлгани йўқ.

- Фаолиятингизда илк бор легионер сифатида чемпионлик совринини ютдингиз, легионер мақомида. Бу қандай туюлди, сизга?

- Тўғри, легионер мақомида биринчиси. Билмадим, балки олдин менда чемпионлик бўлганигами, у қадар ўзгача туйғу кузатилмади. Албатта, жамоа учун хурсанд бўлдим. Чунки биринчи марта 3 та Кубокни қўлга киритди.  

- Кейинги режангиз биз учун қизиқ. Клубда қолиб давом эттирасизми ёки кетмоқчимисиз?

- Ҳозирча номаълум. Чунки мураббий ўзгарди. Нима бўлишини кўрамиз. Таклиф бўлса ўйлаб кўрамиз, бўлмаса бошқа вариантларга қараймиз.

-  Суперлигага қайтиш ҳақида ўйламаяпсизми?

- Ҳозирча, бу ҳақида билмадим. Вақт кўрсатади. Эндигина таътилга чиқдик. Юртимизга қайтиб келганман. Ҳозирча уйдаман. Озгина дам олгандан кейин аниқ бўлади. Лекин таклифлар бўляпти. Ўйлаб кўриб, қарор қиламан.

- Ҳозирги клубингиз билан шартномангиз амалда борми? Балки легионер сифатида бошқа мамлакатда ўйнашни истаётгандирсиз...

- Йўқ, шартномам тугади. Бошқа мамлакатлардан ҳам таклифлар бор. Боя айтганимдек, барчасини вақт кўрсатади.

Шуҳратбек Жўраев.