Конор МакГрегор ҳамда Дастин Порье кимда имконият юқори? Ўзбекистонлик яккакураш олами вакиллари жавоб берди

БААдаги “Жанглар ороли”да ташкил этиладиган “UFC 257” турнирига ҳам оз муддат қолди. Янги йилнинг илк ойи, яъни 23 январь (Тошкент вақти билан 24 январга ўтар кечаси) мазкур жанг кечаси ташкил этилади. Маълумки, ушбу оқшомнинг марказий жангидан барча орзиқиб кутаётган Конор МакГрегор ҳамда Дастин Порье қарама-қаршилиги ўрин олган. Улар аввал ҳам тўқнаш келган. Ўшанда ирландиялик “шоумен“ биринчи раунднинг ўзида техник нокаут билан ғалабага эришган эди.

Лекин бу жанг анча аввал, 2014 йилда содир бўлган. Порье эса ундан сўнг, анча ўсишга эришди ва мукаммал жангчига айлана олди. Демоқчимизки, бу сафар Конорга осон бўлмайди. Дастин Макс Холлоуэй, Жастин Гэтжи, Энтони Петтис, Дэн Хукер каби ажойиб жангчиларни ҳам мағлуб эта олди. Ҳабиб Нурмагомедовга ҳам жиддий қаршилик кўрсатганди. Хуллас, жуда ажойиб жанг бўлади.

Биз анъанамизга содиқ қолган ҳолда, ушбу жанг юзасидан ўзбекистонлик яккакураш усталари ва мураббийларининг фикрлари билан қизиқдик.

Бекзод Абдураҳмонов – эркин курашчи

-Ҳар иккиси ҳам жуда кучли, чиройли ҳаракат қиладиган жангчилар. Улар учун ушбу жанг осон бўлмайди. Лекин мухлислар учун жуда қизиқ тўқнашув бўлади, деган фикрдаман. Имконият барибир Конорда юқори. Ўйлайманки, Конор МакГрегор ғалаба қозонади.

Жаҳонгир Қорабоев – мураббий

- Тўғриси, Дастин Порьега мухлислик қиламан. МакГрегорни хулқи, феъл-атвори менга маъқул келмайди. Шундай бўлса-да, унинг бу жангдаги имконияти юқори. Менимча, Дастиннинг ғалаба қозониш имконияти пастроқ.

Баҳодир Боқиев – ММА жангчиси

Албатта, Конор МакГрегор жуда зўр жангчи. Лекин ҳозирги ҳолатда Дастин Порье уни мағлуб эта олиш салоҳиятига эга. Умуман айтганда, бу жангда Порье 100 фоиз ғалаба қозонади.

Фаррух Мадаминов – мураббий

- Шубҳасиз, Конор МакГрегор ғалаба қозонади. Унинг ҳозирги жисмоний ҳолати жуда яхши. Машғулотларга жиддий қарамоқда. Ҳабиб Нурмагомедов унга керакли сабоқни бериб қўйди. Шунинг учун у ҳар бир жангга масъулият билан ёндашмоқда.

Мансур Тўғизбоев – мураббий ва рефери

- Дастин Порье ғалаба қозонади. Конор аввалги Конор эмас! У “шоумен”га айланиб, бироз ўз устида ишламай қўйган. Порьеда эса анчагина ривожланиш бор. Қолаверса, аввал ҳам у билан жанг қилган. Конорни яхшилаб ўрганганлиги аниқ.

Нозимжон Тўйчиев – Ўзбекистон ММА ассоциацияси Андижон бўлими раҳбари

- Бу жангда Конор МакГрегорнинг ғалаба қозониш имконияти яхшироқ. Лекин Порье ҳам шунчаки “совға” эмас. У жиддий рақиб. Шундай экан, бу жангдан фақат томошабинлар ютади. Чунки, қизиқарли ва шиддатли тўқнашув бўлиши аниқ.

Муҳаммадали Тоштурғунов – кикбоксингчи

- Биринчидан, бу жангда тайёргарлик ҳам катта роль ўйнайди. Улар ўртасидаги биринчи баҳсда ҳам МакГрегор катта устунлик билан биринчи раунднинг ўзида жанг тақдирини ҳал қилиб қўйган. Ҳабиб Нурмагомедов билан жангларини солиштирсак, Конор тайёр бўлмаган ҳолатда ҳам Порьега нисбатан жиддий қаршилик кўрсатганди. Конор ҳар қандай рақиби учун ноқулайлик туғдира олади. Сабаби, чапақай, қўл-оёқлари узун ва сўнгги вақтда курашга ҳам жиддий эътибор қаратган. Хуллас, бу жангда Конор МакГрегор ғалаба қозонади, деб ўйлайман.

Авлиёхон Ҳамидов – ММА жангчиси

- Бу қарама-қаршиликда имкониятларни 50/50, дея баҳолаган бўлардим. Бироқ Дастин Порье ғалаба қозонади, деган фикрдаман. Аммо ҳар иккиси учун осон бўлмайди.

Дилшод Мирзаев – мураббий

- МакГрегор тажрибали жангчи. Шунингдек, у ҳеч қачон кучли зарба ўтказиш оқибатида нокаутга учрамаган. Дастин Порье ҳам асосан кучли зарбасига таянади. Икки шундай услубдаги жангчилар ўртасида жуда чиройли баҳс бўлади. Ҳар иккисининг кураши деярли бир хил. Лекин грэпплинг бўйича МакГрегор кучлироқ. Қолаверса, ирландиялик жангчи ўзига хос стойкаси орқали масофани ҳам яхши хис қилади. “Лоу-кик”зарбаларидан ҳам яхши ҳимояланади. Қисқа қилиб айтганда, имкониятлар 70/30 МакГрегор фойдасига. Албатта, бу менинг шахсий фикрим.

Кино оламини ларзага келтирган яккакураш усталари ёхуд миллионлаб болаларнинг кумирига айланган актёрлар

Ўзбекистонлик ММА вакили иштирок этган турнирда оммавий муштлашув юзага келди (Видео)

Қирғизистон промоушенида яна икки нафар Ўзбекистон вакили жанг қилади

Ўзбекистонлик жангчи "AMC Fight Night 99” турнирида бразилиялик рақибини мағлуб этди