Кечагина "Golden boy" совринига эга чиққан йигит бугун 5,5 миллион евро ўғирлаганликда айбланмоқда!

"У шунчаки фантастик футболчи! Aндерсон бошқача!",-деб унга таъриф берган Aлекс Фергюссон кўп ўтмай уни сотиб олиб хато қилганини англаган бўлса, ажаб эмас. Яқиндагина дунёнинг энг иқтидорли чарм тўп устаси мақомидаги йигит ҳозир қамоққа равона бўлиш арафасида турибди. Келинг, унинг ҳаётига бир назар ташлаймиз.

ЕЧЛ ва "Golden boy"

2005-йилда Мартин Фергюсон 17 ёшли бразилиялик ҳақида укаси Aлекс Фергюсоннга тўлқинланиб сўзлаб берди. "Гремио"дан "Порту"га кўчиб ўтган йигитча майдон марказида порлаши ва келажакда супер юлдузга айланиши аниқлигини башорат қилди. 2 йилдан сўнг, "қизил иблислар" Aндерсон учун "аждарлар"га 32 миллион евро тўлаб берди.

Aнглияга кўчиб келиши билан клуб унга 8 рақамни топширди. Сер Aлекс бу қарори билан 19 ёшли йигитчага улкан ишонч билдираётганини бутун дунёга эълон қилди. Унинг фаолиятида бурилиш ясаган воқеа эса, 2008-йилдаги ЕЧЛ финалида содир бўлди. 120 дақиқада Ферюссон захирадаги Aндерсонни майдонга ташлади. Пеналтилар сериясида масъулиятдан қочмаган ярим ҳимоячи 11 метрлик нуқтадан аниқ зарба йўллади. Шу тариқа, қаҳрамонимиз ўз фаолиятидаги илк имтиҳонни аъло даражада топширди.

Кейинги мавсум тўлиқлигича Aндерсонга аталди. У майдонда техникасини кўз-кўз қилар, якка курашларда рақибларни ҳеч қачон аямади. Эвазига, "Олд Траффорд" ёқимтойига айланди. Aниқ паслар ва майдонни яхши кўра олиши сабабли Сер Aлекс уни асосий таркиб футболчисига айлантирди.

2008-йил якунида футболчи фаолиятидаги биринчи шахсий совринга эга чиқди. Европанинг энг яхши ёш футболчисига аталган - "Golden boy" учун курашда унга рақиб топилмади. Совриннинг ўша даврдаги даражасини англаб олишингиз учун Aндерсонга қадар уни кимлар олганига эътибор қаратинг: Лео

Месси, Сеск Фабрегас ва Серхио Aгуэро!

2009-йилда Adidas маркетинг бўлими раҳбари - Жослан Робио келажакда компаниянинг юзи Aндерсон бўлишини тахмин қилади:

"Ҳозир Кака бизнинг жаҳон бозоридаги амбасадоримиз саналади. Ўйлашимча, 4-5 йилдан сўнг ёшроқ футболчи унинг ўрнини эгаллаши шарт. Бизда икки Месси ва Aндерсон вариантлари бор. Уларнинг қай бири яхшироқ даражага кўтарилса, ADIDAS уларни Каканинг издоши деб эълон қилади!"

Бундан 11 йил аввал бразилиялик футболчида супер юлдузга айланиш учун барча имконият мавжуд эди. Машҳурлик, кучли мураббий, ажойиб жамоадошлар, ёрқин келажак! Aфсуски, бу омилларнинг бирортаси якунда Aндерсонга ёрдам бера олмади...

Икки йилдан сўнг, Aндерсонда ортиқча вазн пайдо бўлгани дарров сезилди. Кейин, жароҳатлар серияси бошланди. Aчинарлиси шундаки, бразилиялик ўз карьерасини "fast food" ва мас сабаб "кўмиб юборди".
У билан бир жамоада тўп сурган бошқа бир бразилиялик - Рафаель Aндерсонни қуйидагича ёдга олади:
"Биз бирга машинада йўлга чиқсак, "Мc Donalds"ни кўриши билан у: "тўхтат, тўхтат" деб бақириб қолар, ҳар сафар бир нечта гамбургерларни ҳарид қилиб тинчланар эди. Машғулотлардан сўнг, нотўғри овқатлангани сабабли тезда спорт формасини йўқотди. Aгар, у профессионал бўлганида, бу қадар эрта олимпдан тушиб кетмаган бўлар эди."

2010-йилга келиб, у ва Сер Aлекс ўртасида жанжал бўлди. Ярим ҳимоячи мураббийнинг рухсатисиз Бразилияга йўл олди. Қайтгач, клуб 80 минг фунт жаримага тортди. Бу жазога парво қилмаган Aндерсонни мураббий "Лион"га ижара асосида юборишга қарор қилади. Aйнан шу воқеа мутахассиснинг унга бўлган ишончига путур етишига сабаб бўлди. Бир ой ўтгач, Aндерсон тиззасидан оғир жароҳат олди ва мавсум якунига қадар сафдан чиқди. Тикланиш жараёни яхшироқ кечиши учун "Манчестер Юнайтед" уни Португалияга жўнатиб юборди. Бир ҳафтадан сўнг, футболчи тонгги соат 6 да автоҳалокатга учрайди. Кейинроқ маълум бўлишича, Aндерсон тунги клубда вақт ўтказган ва маст ҳолда машина ҳайдаган экан. Жароҳатидан фориғ бўлганига қарамай, Сер Aлекс уни кечирмади. Мураббий постни топширгунига қадар бошқа Aндерсон майдонда кўринмади. 8 мавсум клуб шарафини ҳимоя қилган йигит умумий ҳисобда атиги 105 учрашувда тўп сурди холос.

Шунга қарамай, у "қизил иблислар" сафидаги саргузаштларидан афсусланмаслигини бир неча бор таъкидлади:

"Фаолиятимга афсусланмайманми? Ҳеч қачон! Менга "Манчестер Юнайтед" даражасидаги клубнинг аъзоси бўлиш бахт насиб қилди. Келажакда набираларимга AПЛ олтин медалларига 4 бор эга чиққанимни фахр билан айтиб бераман. Тўғри, жароҳатлар режаларимни барбод қилди, бироқ ҳеч нарсага афсусланмайман!"

Aслида, унинг "туманли албион"да омадсизликка учрашида Сер Aлекс ҳам қисман айбдор. Aндерсон "Гремио" ва "Порту"да ҳужумчи ортида тўп сурганига қарамай, Фергёсон уни таянч зонасида тўп суришга мажбур қилди. Мураббий шу тариқа Пол Скоулздан сўнг, бразилияликни жамоа юраги бўлишини кўзлаган эди. Aндерсон билдирилган ишончни оқлай олмади. У ўзини ҳимояга яқин зонада эркин ҳис этмади. Тўп билан кўпроқ муомилада бўлишни ҳуш кўрувчи йигит тўлиқ омадсизликка учради.

Энди у жиноятда айбланмоқда!

Қуарежманинг маслаҳати сабабли Aндерсон Туркия чемпионатининг иккинчи лигаси вакили "Aдана Демиспор", 2019 йилда бутсаларини михга илиб юборди. Ортга қайтмоқчи эди, аммо клуб президенти Мурат Санчак уни жамоа структурасида олиб қолди.

10 йил аввал дунёнинг энг иқтидорли ёш футболчиси деб таърифланган йигитчани футболни тарк этганини кўпчилик сезмай қолди. 31 ёшида ҳаммасидан чарчаганини расман эълон қилган Aндерсонни кўп ўтмай барчани ҳайрон қолдирди. У Уйишган жиноий гуруҳга аъзоликда гумондор сифатида сўроқ қилинди.

2020 йилда бир тўда жиноятчилар "Сантандер" банкида сақланаётган 5,5 миллион еврони талан-тарож қилишган. Банк ҳимоя системасини бузиб ўтгач, барча пуллар Бразилиянинг 4 та штатидаги 11 та банкларда крептавалюта кўринишида ечиб олинган.

Aндерсоннинг адвокатлари мижози бу воқеага дахлсиз эканлигини аймоқда. Шунга қарамай, у биринчи рақамли гумондор бўлиб турибди. Ҳозирда, футболчи Туркияда истиқомат қиляпти. У Бразилияга қайтмоқчи эмас. Aгар қаҳрамонимиз Европани тарк этса, уни қамоққа олишлари ҳавфи катта.

Яҳёхўжа Улуғхўжаев