Катта йўқотиш: “Барса” футболчиси бир йил тўп теполмайди

“Барселона”нинг энг истеъдодли ўйинчиларидан Марк Берналь узоқ вақт майдондан ташқарида қоладиган бўлди.

Клуб матбуот хизмати 17 ёшли ярим ҳимоячи чап тиззасидан олган оғир жароҳатини операция қилдиргани ҳақида маълумот тарқатди.

Берналь 27 август куни Испания чемпионати 3-тури доирасида “Райо Вальекано”га қарши ўтказилган учрашувда шикастланганди. Клуб тиббиёт ходимлари жароҳатни оператив йўл билан даъволашни таклиф қилишди.

Операцияни таниқли шифокор Жоан Карлес Монльяу ўтказди. Жарроҳ амалиёти муваффақиятли ўтганига қарамай, Берналь бир йил тўп тепа олмаслиги айтилди.

Клуб тарбияланувчиси бўлган Марк Берналь ёзда “Барселона”нинг асосий жамоасига қабул қилинган ва Ла Лиганинг биринчи туридан бери мунтазам ўйнаб келаётган эди.