Грузиянинг Тбилиси шаҳрида каратэ WKF бўйича жаҳон рейтинг балларини берувчи “ А” cерияси таснифида ўтаётган мусобақада ўзбекистонлик спортчи совриндорлар қаторидан жой эгаллади.
87 та давлатнинг минг нафардан зиёд каратэчилари иштирок этаётган йилнинг илк рейтинг турнирида бош мураббий Сулаймон Юсупов бошчилигидаги Ўзбекистон терма жамоасининг 16 нафар аъзоси Ватанимиз шарафини ҳимоя қилмоқда.
Иштирокчи давлатлар рўйхатига назар ташланса, турнирда Эрон ва Грузия терма жамоалари 140 нафардан, Туркия 105, Италия 80, Қозоғистон 46 нафар шунингдек, Россия, Япония, Франция жамоалари 30 нафардан ошиқ иштирокчи билан мусобақада иштирок этмоқда.
Тбилиси татамиларида кечаётган турнирнинг аёллар ўртасида -55 килограмм вазн тоифасидаги баҳсларда терма жамоамиз аъзоси Севинч Раҳимова каратэнинг кумитэ йўналишидаги жангларда бир қатор тажрибали рақибларини енгиб, финал йўлланмасини қўлга киритди.
Севинч Раҳимова финалгача Англия, Эрон, Туркия каби бир қатор мамлакатларнинг маҳоратли каратэчиларидан устун келди. Ҳамюртимиз мағлуб этган спортчилар орасида жаҳон чемпионати совриндорлари, Европа ва Осиё қитъаси чемпионлари бор эдики, бу, унинг ҳар бир баҳси финал даражасида ўтганлигини англатмоқда.
Мураккаб кечган финал жангида ҳамюртимиз япониялик каратэчи қизга очколар ҳисобида имкониятни бой бериб, кумуш медални қўлга киритди.