Икки аргентиналик юлдуз бир жамоага сиғмайди

“Ювентус” раҳбарияти аргентиналик ҳужумчи Пауло Дибала билан шартномани янгиламайдиган бўлди. Бу футболчи катта эҳтимол билан “Интер” сафига ўтиши кутилмоқда. Чунки Дибала ўзига харидор кўплигига қарамай, А Серияда қолишга қарор қилган.

Дибаланинг миланликлар сафига қўшилиши бошқа бир аргентиналик юлдуз – Лаутаро Мартинеснинг “Интер”даги фаолиятига таъсир қилиши мумкин. Шу боис, “Атлетико” ёзда Лаутарога таклиф жўнатмоқчи ва бу трансфер амалга ошишига ишонмоқда.

Мадридликлар устози Диего Симеоне ўз ҳамюрти учун Испанияда мукаммал шароитлар яратиб беришга тайёрлигини билдирган. Айни пайтда “Атлетико” кўп гол ура оладиган ҳужумчига эҳтиёж сезмоқда.

Лаутаро жорий мавсумда барча турнирларда 39 маротаба майдонга тушиб, 16 та гол ва иккита голли пас муаллифи бўлди.

Пауло Дибала эса, 29 та учрашувда 13 та гол уриб, олтита ассист қайд этди.