“Пахтакор” клуби Тошкентда “Мавсум-2021”га тайёргарлигини давом эттираётганидан яхши хабардорсиз. Шу билан бирга “шерлар”да қандай ўзгаришлар юз бераётганини ҳам кўпчилик ўқувчилар билса керак-а?
Бир қатор етакчилар кетди, ўрнига янги ўйинчилар олиняпти. Табиийки, “Пахтакор”да юз бераётган ўзгаришлар диққат-марказимизда бўлиб турибди.
Масалан, маълумот ўрнида шуни айтиб ўтишимиз керакки, куни кеча қўшилган Сардор Рашидов ҳамда Шароф Муҳитдинов билан эртага шартнома имзоланиши кутилмоқда. Шунингдек, яна бир эътиборимизни тортган жиҳат шундаки, бу ҳужумчи Игорь Сергеев билан боғлиқ.
Мавсумга тайёргарликни “Пахтакор” билан бошлаган ҳужумчи 21 январь куни клуб билан Дубайдаги йиғинга жўнаб кетмади. Шундан кейин, унинг мақсади фаолиятини бошқа клубда давом эттириш эканлиги билинганди. Устига-устак, Сергеевнинг шартномаси ҳам тугаганди. Ўтган вақт давомида Игорь борасида турли хабарлар ҳам чиқиб турди. Масалан, уни легионерга айланиши катта эҳтимоллиги айтилмоқда. Шу сабабли, ҳужумчига Хитой, БАА, Таиланд клубларидан таклифлар борлиги хусусида ҳам хабарлар йўқ эмасди. Натижада уни четга кетишини кута бошладик. Лекин ҳалигача Сергеев борасида бирор хабар йўқ. Аниғи шуки, у эркин агент сифатида жамоасиз юрибди. Балки музокаралар 28 ёшли ҳужумчи учун кўнгилдагидек кечмаётгандир ёки бошқа вариантларга эътибор қаратаётгандир, буниси ҳозирча бизга қоронғу.
Шуни айтиш мумкинки, Игорь ўтган мавсумни ёмон ўтказгани йўқ. У Суперлига баҳсларида 16 та гол урди. Аслида ҳужумчининг “Пахтакор”ни тарк этишига нима туртки бўлди? Биламизки, Сергеев катта футболга айнан “Пахтакор” орқали кириб келган ва ушбу клуб тарбияланувчиси ҳисобланади. 2011 йилдан бери “Шерлар” шарафини ҳимоя қилиб келаётганини эслатиб ўтиш ўринли. Балки шу боис, ҳужумчи муҳитни ўзгартиришни истаб қолган бўлса не ажаб!
Тўғри, ўтган вақт давомида Игорь Сергеевнинг икки марта хорижда тўп суриб келганини ҳам ёддан чиқармаслик керак. Биринчи марта легионер сифатида 2016 йили Хитойга кетди. Ўшанда у “Бейжинг Гоан” жамоасида тўп сурган ва 14 та учрашувда 1 та гол урган. Сўнг, “Пахтакор”га қайтгач, орадан кўп ўтмай, иккинчи маротаба легионер мақомида тўп суришга киришди. Бу сафар БААнинг “Ал-Дафра” клуби билан шартнома имзолади. Лекин Сергеевнинг у ердаги фаолияти у қадар ёрқин чиқмади. 10 та ўйинда 1 та гол! Натижада яна “Пахтакор”га қайтиб келган.
Охирги икки мавсумдан бери Игорь “Пахтакор”да тўпурарлик салоҳиятини кўрсатиб келаётганди. Балки, таркибда Черан бўлмаганида Сергеев тўпурарга айланиши ҳам мумкин эди.
Хуллас, Игорь фаолияти давомида шу пайтгача учта клуб – “Пахтакор”, “Бейжинг Гоан” ва “Ал-Дафра”да тўп сурди. Навбатдагиси эса унинг футболчилик фаолиятида тўртинчи клубига айланади. Лекин ҳақли савол туғилади: у қайси жамоада тўп суради? Яна легионерга айланадими ёки ўзимизнинг Суперлигада қоладими? Бу борада шуни тахмин қилса бўладики, Игорь аввало хориждаги клублар билан музокараларга киришган. Ўзаро келишувларда бир тўхтамга келинмаётгани сабабли ҳам у ҳозиргача янги клубига эга бўлгани йўқ. Агар яна чемпионатимизда тўп сурмоқчи бўлса, у ҳолда янги клубга ўтиши узоқ куттирмасди.
Аммо эшитишимизга қараганда, тез орада Сергеевнинг қайси клубда тўп суриши ойдинлашади. Ана шунда унинг қаерда эканлиги борасидаги саволга ҳам ҳожат қолмайди!